ZAZAKÎ NEWS – Nuştoxanê kitabî ra Şahap Laçînî derheqê kitabî de Zazakî Newsî rê qisey kerd.
Kitabê Zazakî – Îngilîzkî yê bi nameyê “Rayîrberê Qalîkerdişî Phrasebook”î vejîya. Nuştoxê kitabî Şahap Laçînî derheqê kitabî de malumat da û wina va:
Mi wexto ke qezaya merkezî yê Dîyarbekir Yenîşehîr de Merkezê Perwerdeyê Şarî de kursê zazakî dayêne û mi Hamza şinasna. O zî semedo ke zazakî bimuso ameyêne kurs. Hamzayî serra perwerdeyî-musayişî 2022-2023 dewrê diyêne de seranser kursê zazakî rê dewam kerd. Hamzayî mi rê aşma tebaxe (2024) de telefon kerd û va “Mi dest de xebata rayîrberê qalîkerdişê kurmancî û îngilîzkî esta.” Eke ti wazenî ma rayîrberê qalîkerdişê zazakî û îngilîzkî binusê. Mi zî va “Beno û ez keyfweş bena.” Dima mi ey ra va ke o wext ma ganî rayîrberê qalîkerdişê kurmancî û zazakî zî binusê. Hamzayî kitabê kurmancî û îngilîzkî aşma teşrîna peyêne (2024) de vet la ê sebebê ke ma dest nêbî kitabê zazakî û îngilîzkî, kurmancî û zazakî mendî.
Pêro pîya zereyê kitab de hîris û di (32) mewzûyî estê. Ma alfabe ra dest bide kerdo û vateyê verênan de vindetî. Heta ke ma dest ra ameyo ma mewzûyî zaf asan girewtî. Rocane de tewr zaf kamcîn çekuyî yenê şuxulnayiş ma înan ser vindetî. Xora kitabê rayîrberê qalîkerdişî de ma rê qalîkerdiş muhîm o û ma gramerî ser ro qet nêvindertî. Ma peynîya tewr kitab de yew ferheng amade kerdo û no ferheng de çekuyê ke kitab de ca gênê her di ziwanan de dayê têver.
Kunye: Hamza Tokmak, Şahap Laçin, Rayîrberê Qalîkerdişî Phrasebook, Weşanxaneyê Ronya, Wan, Êlule 2025, 94 Rîpelî.
