ZAZAKÎ NEWS - – Bi destpêkerdişê serrgêra perwerdeyî û musnayîşî ya 2025-2026î, Çolîg de 374 mekteban de, 60 hezar wendekarî û 4 hezar û 530 malimî dest bi dersan kerd. La nê wendekaran ra yewê ci zî perwerdeyê bi Zazakî nêvîneno.
Badê ke tetîlê hamnanî qedîya, sey pêro Tirkîya, Çolîg de zî serrgêra perwerdeyî û musnayîşî ya 2025-2026î dest pêkerd. Çarçeweya nê de, pêro şaristan de 374 mekteban de, 60 hezar wendekarî û 4 hezar û 530 malimî dest bi dersan kerd.
Tirkîya de, cayanê ke tede Zazayî cuyenê de Zazakî ziwanêko fermî nîyo û perwerdeyê bi Zazakî çin o. Gedeyî (Domanî) yenê asîmîlekerdiş. Herçiqas mektebanê mîyanênan de hefte de 2 saetî dersa Zazakî ya weçînite esta zî, yew perwerdeyo ke sere ra hetanî peynî bi ziwanê Zazakî bo, çin o.
