Dewa qezaya Darahênî ya Çolîgî Çimê Hênî de Santralê Enerjîya Tîşe (GES) yeno viraştiş.
Ame zanayîş ke dewa Çimê Hênî ya Darahênî de 540 dolim erd ser o qûwetê ey 10 MWe Santralê Enejî yê Tîje yeno viraştiş.
Muxtarê dewe Sabri Taş Keyepelê Gencin Sesî rê qisê kerd û va ; " Ma hema newe pêhesyayê ke kişta dewa ma de hê GES virazenê. Bawkalê ma verî ra nata na deşte ser o heywanî weyî kerdê. Ma zî tîya de heywananê xo weyî kenê û bê heywanê ma malêkê ma tîya de çin o. "
Sabri Taşî da zanayîş ke, na deşte cayê çernayîşê heywananê înan a, cayêko tescîlin o û wîna va "Çîyo ke kenê qanûnî zî nîyo. Hêgayê ma tîya de cayê çernayîşê heywananê ma tîya de yê. Bê xebera ma înan no qerar dayo. Ma qebûl nêkenê. Semedo ke na deşta ma, ma destî ra nêgêrê çi destê ma ra bêro ma do bikerê."
Çimeyê Xeberê: Gencin Sesî
