ZAZAKÎ NEWS – 8ê Êlule de serrgêra perwerdeyî û musnayîşî ya 2025-2026î bi tewrbîyayîşê 18 mîlyon wendekaran û 1 mîlyon û 200 hezar mamosteyan dest pêkerd.
Ziwan Kom, Beşê Ziwan û Edebîyatê Kurdkî yê Unîversîteya Dîcle, Hereketê Ziwanê Kurdkî û Komela Ziwanê Kurdkî, waştişanê xo yê derheqê perwerdeyê Kurdkî de rayaumûmîye rê eşkera kerdî.
‘Wa astengê verê dersanê weçînînteyan bêrê wedaritene’
Eşkerayîya pîyakî de, ame vatene ke 2012î ra nat averşîyayîşê perwerdeyê Kurdkî yenê teqîbkerdene û ame vatene ke gerek vernîya “kerdişanê keyfîyan û astengkerdişan” ê ke vernîya caardîşê dersa Kurdkî ya weçînite de estê, bêro girewtene.
Sazîyan no teleb kerd: “Gerek seba ke Kurdkî, ke Tirkîya de ziwanê diyîn o tewr gird o, verê mektebî ra hetanî peynîya lîse mecbûrî bo, seba ney qanûnî bêrê vurnayîş.”
410 hezar wendekarî, 205 malimê tayînkerdeyî
Eşkerayîye de nê çîyî ameyî parekerdiş: “13 serran de hûmara malimanê mezunan ê lîsansê Kurdkî 826, hûmara malimanê Kurdkî yê ke formasyon temam kerdo 723, hûmara muracatanê seba malimîya Kurmanckî 51, hûmara muracatanê seba malimîya Zazakî 27, hûmara malimanê Kurdkî yê ke ameyê tayînkerdene 205, hûmara malimanê Kurdkî yê ke branşê xo vurnawo 45, hûmara malimanê Kurdkî yê ke îstîfa kerdo 10 û hûmara wendekaranê ke bi temamî dersa Kurdkî girewta 410.000 bîya.”
4 waştişê esasî yê nê sazîyan zî nê yê:
1. Wa kontenjanê 5 beşanê Ziwan û Edebîyatê Kurdkî bêrê vetene 40î.
2. Wa Beşê Ziwan û Edebîyatê Kurdkî yê Wanî bi kontenjanê lîsansî yê 40 Kurmanckî û 40 Zazakî dest bi perwerdeyî û musnayîşî bikero.
3. Tayînkerdişê 10.000 maliman de, 43 pozîsyonanê vengan ê malimîya Kirmanckî ra wa 20 hebî û 3 pozîsyonanê vengan ê malimîya Zazakî ra zî wa 1 heb bêro tayînkerdene.
4. Wa xebata dersa weçînite ya Kurdkî ya lîseyan, ke serra 2016î de hetê Heyetê Telîm û Terbîye ra amebî vindarnayene, newe ra bêro destpêkerdene.
Nê sazîyî do texmînen 13ê Êlule de beyanat bidê çapemenî
Ca: Dîyarbekir Memursen
Tewrbîyayeyî:
Ziwan Kom
Beşê Ziwan û Edebîyatê Kurdkî yê Unîversîteya Dîcle
Têgêrayîşê Ziwanê Kurdkî
Komela Ziwanê Kurdkî