Meclîsa Odaya Sanayî û Bazirganî ya Dîyarbekirî kombîyayîşê xwu yê aşma Hezîranî kerd. Meclîsa DTSOyî kombîyayîş de pêrodayîşê Bismilî ke 9 welatî ameybî kiştiş ser o zî vindert. Meclîse veng da şarî ke wa meseleyanê xwu pê pêameyîş safî biko.
Kombîyayîşê Meclîsa DTSOyî de ame vatiş ke, herême de bi serrano ke problemê arazîyan esto û ame waştiş ke wa nê meseleyî bêrê safîkerdiş û vernîya enê tewir pêrodayîşan bêro girwtiş.
Qismêkê netîceyê kombîyayîşî wina yo:
"Herêma ma de semedo ke ma bieşkê vernîya nê pêrodayîşan bigîre, gere bi leze prosesê hûqûqî bêro temamkerdiş. Gerek heme dezgeyê sivîlî, rîsipî û şarê enê şaristanî enê meseleyan de xesas bê û semedê aşitîya xwumîyanî çi destê înan ra bêro bikê. Ma semedê hedîseya Bismilî zaf xemgîn ê. Ma keyeyanê êyê ke dinyaya xwu bedilnayê rê serweşî û sebir wazenê. Ma her di hetan ra wazenê wa werê bêrê û mîyanê xwu de pêameyîş bikerê.”
