ZAZAKÎ NEWS - Qezaya Erdexanî Mêrdînîk de yew dewe bi nameyê Gundîk esta. Pêroyê Erdexanî de tena na dewe dewa Kirmancan-Zazayan a û şarê dewe bawerîya xo zî Elewî yo.
Goreyo ke yeno zanayene 200 serrî verî şarê na dewe Dêrsîm ra sebebo ke nêno zanayene ra verê xo dayo qezaya Muşî Gimgim. Şar uca zî sitar nêbîyo û bi mal-milk, doman û pezê xo verê xo dayo Erdexan û dewa Gundîk de bica bîyo.
Şarê Gundîkî bi serran o ke bi karê weykerdişê heywanan û ramitişê erdî uca xo rê kerdo welat.
Goreyo ke zanîyeno hetanî serra 70-80î dewe de qasê 500 keyeyî estbîyê bi qasê hîrê hezar kesî tede ciwîyayêne.
No fotografe serranê 1980'an de ameya antene
Labelê ewro hema vej tena 100 keyeyî dewe de mendê û goreyo ke texmîn beno dewe de tena 300-400 kesî mendê.
Şarê Gundîkî şarêko wende yo û seyan gêncî mekteban de wendişê xo bi hawayo serkewte temam kerdê û şîyê şaristananê bînan de bîyê karmend.
Şarê dewa Gundîkî mabênê nê demî de sebebanê ekonomi û sîyasî ra zafê xo barê şaristananê sey Îstanbûl, Anqara û Îzmîrî kerdo.
Dewe de xususî nifusê kalûpîran kêmî bîyo. Labelê êyê ke şîyê teber zî wextê hamnanî de yenê dewe û merdimanê xo ziyaret kenê.
Dewe de yew cemxane esto û şarê ma yo Ewlewî uca îbadetê xo keno.
Şarê dewe hîna zî ziwanê Kirmanckî-Zazakî qisey keno.
Enwer Yılmaz
