ZAZAKÎ NEWS - Artêşa Îsraîlî eşkera kerd ke seba "wedaritişê tehlukanê vera Îsraîlî" înan vera Îranî hêrişêko "vernîgirewtox" dayo dest pêkerdiş. Wexto ke hêriş ame kerdiş, seranserê Îsraîlî de sîrenî cenîyayî û OHAL ame îlankerdiş.
Wezîrê Pawitişî yê Îsraîlî Îsrael Katzî, seranserê welatî de Halê Awarte îlan kerd. Ame vatiş ke mektebî ameyî girewtiş û kombîyayîşê kamuyî ameyî betalkerdiş; veng dîya şarî ke wa keyeyanê xo ra mevejîyê.
Hêrişî koordîneyî yê
Goreyê xebera New York Timesî artêşa Amerîka paştî dana Îsraîlî. Tayê çimeyî vanê ke Amerîka bi awayêko rasterast zî hêrişê hewayî yê vera Îranî kerdê. Rayedarêkê Wezaretê Pawitişî yê Îsraîlî zî rast kerd ke hêrişî bi koordînasyonê Amerîka ameyê kerdiş.
Kirmanşan û Tebrîz de zî teqayîşî
Teberê paytext Tehranî de, bajaranê bînan ê Îranî de zî vengê teqayîşan ame. Ajansanê xeberan ê Îranî da zanayîş ke Îsfahan, Qûm, Karaj, Kirmanşan û Tebrîz de zî teqayîşî estê.
Trump: Beno ke eskerê ma bimirê
Serekê Amerîka Donald Trumpî dima ke hêriş dest pêkerd eşkerayîya verêne da û va: "Welatê ma wextêko kilm verê cû vera Îranî operasyonêko pîl da dest pêkerdene."
Trumpî va ke armancê înan "wedaritişê tehlukanê lezgînan" o û bi vateyanê balanşitoxan wina dewam kerd: "Beno ke qehremanê Amerîka weşîya xo vîndî bikerê. Cengan de ge-ge mergî benê. La ma ney seba ewroyî ney, seba ameyoxî kenê û no wezîfeyêko rûmetin o."
Hewlêr de hêrişê fuzeyî
Dima ke Îsraîl û Amerîka hêrişê Îranî kerd, Serkonsolosxaneyê Amerîka yê Hewlêrî (paytextê Herêma Kurdîstanî) rê zî hêrişê fuzeyî ame kerdene.
