ZAZAKÎ NEWS – Serekkomarê Tirkîye Recep Tayyîp Erdoganî, Zîrveya 36ine ya Serekanê NATOyî ya ke Anqara de ame viraştiş de, demançeyê taybetî yê tîpê Revolverî dîyarîyê serekan kerdî. Serê demançeyan de nameyê serekanê endamanê NATOyî amebî nuştiş, la wexto ke serekî ageray welatê xo, dîyarîyê Erdoganî rastê astengîyanê qanûnî amey.
Belçîka de polîsan dest na ci ser
Goreyê medyaya Belçîka, Serekwezîrê Belçîka Bart De Wever wexto ke Anqara ra agera welatê xo, qutîya dîyarîya Erdoganî akerde. De Weverî dî ke mîyanê qutî de demançeyêko Revolverî yo ke nameyê ey ser o nuşte yo û qutîyêka guleyan esta. Naye ser goreyê qanûnanê Belçîka ardişê çekan bi no qayde qedexe yo, Serekwezîr mecbur mend ke dîyarîya Erdoganî teslîmê polîsanê teyaragehî yê Merkezê Asmenî yê Melsbroekî biko. Rayedaranê Belçîka va, ardişê her tîpê çekan wextê transîtî de bê destûrê taybetî qedexe yo.
Îngîltere, Almanya û Kanada de zî problem vejîya
Heto bîn ra, Serekwezîrê Îngîltere Keir Starmer zî rastê eynî problemî ame û seba qanûnanê welatê xo, mecbur mend ke dîyarîya xo Anqara de verdo. Serekwezîrê Almanya Friedrich Merz zî demançeyê xo teslîmê Balyozxaneyê Almanya yê Anqera kerd. Welatê Kanada zî aşkere kerd ke çeko ke dîyarîyê înan ameyo kerdene, teslîmê polîsan ameyo kerdene.
Medyaya mîyanneteweyî de no hedîse sey "krîzê protokolê demançeyan" ame namekerdiş. Heta nika Serekkomarîya Tirkîye beyanatêko resmî nêdayo.
