Ali Haydar Gözlü
Amedsporî vizêr deplasmanê Somasporî de 1-0 serkewt û verê qedîyayîşê maçê peyenî yê Menemensporî nika ra şampîyonîya xo îlan kerd.
Sere de Amed, zaf cayanê herême de pîrozkerdişê şampîyonîye dest pêkerdê û şar bi keyf her ca de şampîyonîya Amedsporî pîroz keno.
Dêrsim de zî şampîyonîya Amedsporî bi coşêko pîl amey pîrozkerdiş.
Xeylê kesê ke Meydanê Seyîd Rizayî de ameyî têhet galîbîyetê Amedsporî yê vera Somasporî pîroz kerd. Heskerdoxê Amedsporî formayê taximê xo dayê xo ra, meşxeleyî tafistî û goveng kay kerd.
Hemşaredarê Şaredarîya Dêrsimî Cevdet Konak zî ame mîyanê şarî û o zî tereftaran de pîya goveng kay kerd.
"Erdanê Seyîd Rizayî ra Amedsporî rê silam"
Hemşaredarê Şaredarîya Dêrsimî Cevdet Konakî uca de qiseykerdişêk kerd û va " Ewro serkewtişê Amedssporî bîyo sey serkewtişê weçînayîşê 31ê Adare. Ma bi nê serkewtişan hîna bîyê qewetin. Erdanê Seyîd Rizayî ra, cografyaya Alîşer û Zarife ra ma silam û hurmetanê xo erşawenê Amed. Raşta ci serkewtişê Amedsporî hêvîyêka pîle daya ma. Ma tîya ra soz danê pêroyê heskerdoxanê Amedsporî. Ma pîya qezenc kerd, ma do pîya serbikewê. Wa Xizir ma pêrûne rê ardim bikero "
Şaro ke Meydanê Seyîd Rizayî de ame pêser zî seba şampîyonîya Amedsporî keyfweşîya xo îfade kerd.
Argeş Kayayî va, "Amedspor cuyayîşê Kurdan o. Ma zaf pê keyfweş bîyê. Neheqîya ke Amedsporî rê bîya, nijadperestîya ke Amedsporî rê bîya do rojêk biqedîyo. Ma do tim her ca de wayîrê ci vejîyê."
Hamdin Yılmazî zî va, "Ma ewro tîya de seba Amedsporî ameyê têlewe. Amed, Dersim, Botan û Serhat… Ma qayîlê wa pêro bibê serkewte "
Şahin Karayî zî va, "Petrolspor û Amedspor bîyê şampiyon. Ewro zî Amedspor bîyo şampiyon. Ma ciwanîzaf keyfweş ê. Pêro taximê ma birayê yewbînan ê "
Amedspor hema vaje bîyo şampîyon
Amedsporo ke Koma Sûre ya Lîga 2yîne ya TFFyî de kay keno bi serkewtişê maçê Somasporî hema vaje şampiyonîya xo îlan kerd.
Futbolbazê Amedsporî Oktay Aydin deqaya 49ine golêk eşt û taximê xo 1-0 berd vernî.
Amedsporî bi nê serkewtişê xo puanê xo vet 80 û lîdertiya xo rê dewam kerd.
Hetê bînî ra Kastamonusporo ke rêza diyîne de yo pûanê ey 77 o.
Amedspor do hewtena taximê Menemensporî dir kay biko .
Amedspor bi 3 puan û 11 gol vernîya Kastamonusporî dey o.
Zazakî News / Dêrsîm
