ZAZAKÎ NEWS – Amedsporo ke Lîga 1. ya TFFyî de bi transferanê bitesîran dest bi sezonî kerd, amadekarîye keno ke estareyanê xo yê neweyan û terefdaranê xo bîyaro têhet. Futbolbazo Îsraîlî Dia Saba, o ke 4 maçan de 5 golî eştî û nika ra bîyo estareyê taximî, û kaykerê sehaya werte yo bitesir Aytaç Kara, do 11ê Êlule Roja Pancşeme saete 14:00 de AmedStore de formayanê xo îmza bikê.
Dia Saba, ke bi performansê xo hem Dîyarbekir de hem zî rayaumûmîye ya futbolî ya Tirkîya de nameyê xo dayo şinasnayiş, do reya yewine terefdaranê Amedsporî reyde bêro têhet.
Detayê çalakîye
Roca îmzayan, do dikanê AmedStoreî yo ke Rayîrê Stadyumî ser o yo de, bêro viraştene. Îdareyê kulûbe eşkera kerd ke tena formayê AmedStoreyî yê lîsansinî do bêrê îmzakerdene.
