ZAZAKÎ NEWS - Evîn Încîr, 15ê Hezîrana 1984î de, qezaya Amedî Licê de ameya dinya. Wexto ke 6 serre bîya, keyeyê xo reyde şîye Swêd (Îsveç). Nika bajarê Uppsala de vakurê paytextê Swêdî Stockholmî de ciwîyena.
Evîn Încîr, sîyasetmedarêka Kurd a û pabesteyê Partîya Sosyal Demokrate ya Swêdî ya. Încîr îfade kena ke wexto ke 14 serre bîya, seba ke sîyaset de vurnayîş biko, dest bi sîyasetî kerda. Swêd de sey " rayberanê cîwanan ra yew" yena naskerdiş û endama Cîwananê Enternasyonalîstan ê Dinya ya.
Serra 2019î de reya verêne ameye weçînayîş
Evîn Încîr, weçînayîşanê Parlamentoyê Ewropa (PE) yê serra 2019î de, mîyanê lîsteya Partîya Sosyal Demokrate de sey namzeda 5. vejîyaye û sey parlamentere amey weçînayene.
Încîr, 2019î ra nat Komîsyonê Azadîyanê Sîvîlan, Edalet û Karanê Zereyî de wezîfe kerd. Teberê wezîfeyanê komîsyonî de, serra 2019î ra nat Delegasyonê Komîsyonê Parlamentoyê Têmiyanî yê Yewîya Ewropa (YE)-Tirkîya û serra 2021î ra nat zî delegasyonanê Meclîsê Parlamenteranê Ewropa-Deryasipî (Akdeniz) de ca gêna.
Eynî wext de, a Întergrûba Vera Nîjadperestîye û Rengînîye û Întergrûba Heqanê LGBTI+yî ya Parlamentoyê Ewropa de xebatanê xo domnena. Kanûna 2020î de Încîr, hetê kovara The Parliament Magazine ra layîqê xelata "MEP Awards" ameye vînayîş.
"Ez wazena êşanê Kurdan bidî munaqeşekerdene"
Evîn Încîre, verê weçînayîşan vatbi: “Eke ez bêra weçînayîş, ez do seba ke dejê ke Kurdan antê, zext û bêedaletîyanê ke cuyenê, bîyarî verê çiman û bidî mojnayîş ke hîna zaf bêrê munaqeşekerdiş, ez do bixebitîyî.” Aye da zanayîş ke armancê aye o yo ke sebebanê meseleya Kurdan Parlamentoyê Ewropa de şîrove bikero û Ewropa nê meseleyî hîna eşkera bimuso.
Evîn Încîre weçînayîşanê 2024î de reyna sey parlamentere amey weçînayene.