ZAZAKÎ NEWS - Rêxistina Xosere ya Cinîyan bi yew eşkerayîye da zanayîş ke Herêma Kurdîstanî ya Iraqî de vera cinîyan her tewir cîyakerîye û bêhurmetîye bi hawayêko rêxistinkerde virazîyena. Rêxistine pare kerd ke goreyê îstatîkanê resmîyan, serrane 50 cinîyî yenê kiştene.
Rêxistina Xosere ya Cinîyan, a ke merkezê aye Silêmanîya Herêma Kurdîstanî de yo, derheqê kiştiş û îxlalanê ke Herêma Kurdîstanî de vera cinîyan yenê kerdene de, eşkerayîyêk vila kerde.
Ame vatiş ke averberdişê kulturê camêrd-serwerî, dînperestîye, namûsperestîye û cîyakerîye yo ke hetê îqtîdarî ra yeno kerdene, bîyo sebebê kiştişanê cinîyan.
Rêxistine eşkerayîya xo de vato ke goreyê îstatîstîkanê fermîyan ê sazîyanê hukmatî, serrane 50 cinîyî Herêma Kurdîstanî de yenê kiştene, tayê înan yenê nimnayene û sey hedîseyanê xokuştişî û xovêşnayîşî yenê parekerdene.
Tewr peynî de, Rêxistina Xosere ya Cinîyan veng dana cinî û camêrdan ke wa pîya seba yew cimatêko azad û seypê bixebitîyê.