Ame îdîakerdene ke heyetê Meclîsî yo ke Hetkarê Serekê Pêroyî yê AK Partî Huseyîn Yayman, Hetkarê Serekê Pêroyî yê MHPyî Fetî Yildiz û Wekîla Sereka Gruba DEM Partî Gulîstane Kiliç Koçyîgît ra yeno pê, seba ke ronayoxê PKKyî Abdullah Ocalanî reyde pêvînayîş bikero, do yew-di saetan mîyan de şêro Îmrali.
Komîsyonê Paştdayîşê Mîllî, Birayîye û Demokrasî, hefteyê vîyarteyî de bi qerarê zafane yê 5 ra 3yê endaman, qerarê şîyayîşê Îmrali dabi.
Ame eşkerakerdene ke nameyê ke do şêrê Îmrali nê yê: DEM Partî ra Gulîstane Koçyîgît, MHP ra Hetkarê Serekê Pêroyî Fetî Yildiz û AK Partî ra Hetkarê Serekê Pêroyî û Wekîlê Hatayî Huseyîn Yayman.
Rojnameyê Turkîya: Ewro şinê Îmrali
Goreyê îdîaya Rojnameyê Turkîya, seba şîyayîşê heyetî vizêr Wezaretê Edaletî rê muracat ameyo kerdene.
Îzin ra dima; heyetê Meclîsî yo ke Huseyîn Yayman, Fetî Yildiz û Gulîstane Kiliç Koçyîgît ra yeno pê, seba ke Ocalanî reyde pêvînayîş bikerê yew-di saetan mîyan de do şêro Îmrali. Ame vatiş ke heyet Îstanbul ra bi helîkopter do şêro Îmrali.
Hetê bînî ra yeno vatiş ke o melumatê ke vano "seba pêvînayîşê Ocalanî ewro şinê", tesdîqkerde nîyo.
Yeno îfadekerdene ke melumatê sey "Şîy", "Do şêrê", "1-2 saetan mîyan de şinê" tena îdîa yê.
