ZAZAKÎ NEWS - Gola Hezarî ya ke qezaya Xoxî ya wîlayetê Xarpêtî yê Bakurê Kurdîstanî de ya, roşan de bîye ca û warê îstîrahetî yê hezaran gêrayoxan.
Qeraxê golî bi gêrayoxanê Roşanê Qurbanî bîyê pîr û qet ca nêmendo ke merdim gama xo bierzo.
Hezaran gêrayoxî ke şaristananê bînan ê Bakurê Kurdîstanî ra ameyê, tetîlê roşanî de verê xo da na herêma turistîke û otelî se ra se bîyê pîr.
Mehmet Bahçeciyo ke wayîrê yew kargehî yo, va:
“Ma dest bi demserra xo kerde, zaf kesî ameyî. No pawitişê ma ra zêde bi. Qerebalixîya Roşanê Qurbanî ya tetîlê 4 rojan, sewîyaya tewr berze de bîye.”
Gêrayoxê ke şinê Gola Hezarî, gol de asnaw kenê, bi jetskîyan gêrenê û keyeyanê (malbatanê) xo reyde wexto weş vîyarnenê.
Gêrayox Mehmet Turayî da zanayene ke ê her serre verê xo danê gola Hezarî û va:
“Gola Hezarî zaf weşê ma şinao û ma her serre tetîlanê roşanî de yênê noca. Ma noca ra hes kenê û welatîyan ra waştişê ma no yo ke noca pak bixebitnê.”
Gola Hezarî, mîyanê Koyanê Hezarbaba û Mastarî de, bi qeraxanê xo yê 56 kîlometreyan dergan, wayîrê tebîetêko xusûsî ya.
A, merkezê şaristanê Xarpêtî ra 26 kîlometreyan dûrî ya û amnan û zimistan xeylêk kesî şinê gol.