ZAZAKÎ NEWS - Hemwelatîyê dewa Qerxabazarî ya girêdayeyê qezaya Kanîreşî ya Çolîgî, vera projeyanê jeotermalî razînêbîyayîşê xo mojna. Beyanat verê Komeleya Hetkarî û Piştgirîya Sosyale ya dewe de ame dayîş. Beyanatê çapemenî de pankartê “Qerxabazar de jeotermalî rê rayîr çin o” ame akerdiş û dima ra endamê Komeleya Ekolojîye ya Qerxabazarî Mehmet Ali Harmanciyî qisey kerd.
Harmanciyî dîqet ant talankerdişê tebîetî û cayanê ciwîyayîşî ser. Harmanciyî vat, “Nika cayanê ma yê ciwîyayîşî de, merayanê ma yê ke tede zîret û weykarîya heywanan bena de talankerdişêko hegemonîk esto. Semedê pawitişê çimeyan û xozaya xo ma do pîya mucadele bikerê.”
Harmanciyî da zanayîş ke polîtîkayê emperyalîstî tarîx de tim verê xo dayo çimeyanê qîmetinan û wina vat: “Binê nê tewir polîtîkayan de amancê destvistişê çimeyanê zengînan û goreyê menfaetanê xo xebitnayîşî esto. Ma do vera nê çîyî de cayanê xo yê ciwîyayîşî bipawê.”
Endamê Komeleya Ekolojîye Kasim Demiralpî zî îfade kerd ke ê sey şarê dewe vera projeyanê jeotermalî de yê û vat, “Cografyaya ke ma tede ciwîyenê herêmêka wina ya ke tede xetê fayî yê aktîfî estê û rîskê erdlerzî tede berz o. La wazîyeno ke desan ra zêde bîrê jeotermalî bêrê akerdiş, no hem tebîetê ma hem zî heyatê însanan erzeno tehluke.”
Demiralpî vat ke fealîyetê jeotermalî do awanê binerdî leymin bikerê, erdê zîretî bikerê bêbereket û tesîrêko xirab weykarîya heywanan ser o bikerê û va “Xebatê sondajî yê ke do xetanê fayî ser o bêrê kerdene, eşkenê rîskê erdlerzî zêde bikerê. Na rewşe heyatê hezaran însanan tehdît kena.”
