Xebatkaranê kultur û hunerî desteg da vengdayîşê Abdullah Ocalanî û va: "Ma hadre yê ke wazîfe û mesulîyeto ke keweno milê ma ser bîyarê ca."
Xebatkarê kultur û hunerî ewro Amed de derheqê vengdayîşê "Aştî û Komelaya Demokratîke" ya Rêberê PKKyî Abdullah Ocalanî, Komelaya Kultur û Hunerî ya Dîcle Firatî de beyanat day.
Goreyê xebera Ajansa Mezopotamya zaf hunermendî beşdarê beyanatî bîy. Beyanat Kurmancî û Tirkî ame dayî, kayker Omer Şahîn kurmancî û Neşe Toprak zî Tirkîyê beyanatî wend.
Beyanat de reyna ca nêdîya Zazakî.
Şahînî, wina va:
"No proses de ma reyna wazenê ke wa hukmat bi hassasîyetê Ocalanî yo ke ey seba aştî nîşan dayo, bi eynî hassasîyetî nêzdî bo. Û sey yew muxatabê nê vengdayîşî ma mesulîyetê bingeyîne ya dewlete anî vîrê aye. Ma qîmet danê bingeyê huqûqî û sîyasî ke Ocalanî îşaret kerdo. Ma zanî ke tena o zemîn ser o ma hunermendê Kurdî eşkenî bi azad huner, ziwan û kulturê xo aver berî. Na çarçewe de ma veng danî heme hetanê komelî ke wa desteg bidê perspektîfê Aştî û Komelaya Demokratîke ya ke Abdullah Ocalanî eşkera kerdo. Ma seba yew ameyoxo azad ke mîyanê aştîyêka bi rûmet de bena, tîya de yî û heta awanbîyayîşê komelayêka demokratîke ma do têkoşîna xo rê dewam bikerî."
