Mudirê Rêxistina Heqanê Merdiman a Îranî Mahmood Reza Amiry-Moghaddam, îfade kerd ke Îran de serra 2024î de zaf heqî amey binpaykerdene û 5 aşmanê peyênan de her roje nêzdîyê 6 kesî amey dardîkerdene.
Mudirê Rêxistina Heqanê Merdiman a Îranî Mahmood Reza Amiry-Moghaddam destnîşan kerd ke Îran de 5 aşmanê peyênan de her roje nêzdîyê 6 kesî amey dardîkerdene.
Goreyê xebera Hîvda Çelebî ke Ajansa Mezopotamya de weşanîyaya, Amiry-Moghaddam îfade kerd ke sebebê dardîkerdiş tersnayîşê komelî yo û dewleta Îranî bi cezaya dardîkerdişî ya Pexşan Ezîzî wazena vernîya xoverdayîşanê şarî ke wextê kiştişê Jîna Amînî de virazîyaybî bigêro.
Amiry-Moghaddam destnîşan kerd ke ê her serre derheqê na mesela de raporan amadê kenê û vat: "Sazîya Heqê Merdiman a Îranî serra 2008î ra nat seba dardekerdişanê Îranî raporanê serraneyan amade kena. Aseno ke derheqê dardîkerdişan de serra tewr xirabine 2024î bî. Ma raporê aşman zî weşanayî. Mavajî aşma Tişrîne de tewr tay 168 kesî amey dardîkerdene û tewr zêde na aşme de dardîkerdiş virazîya. Bitaybetî 4-5 aşmanê peyênan de rojane 4-6 kesî amey dardîkerdene."
Amiry-Moghaddam da zanayene ke rejîmê Îranî yew krîzo pîl de yo, nêşkeno meseleyan çareser bikero û seba ke emrê rejîmî derg bikero dardîkerdişan virazeno.