Kolbernewsî, agahîyê derheqê zext û tehdîtanê ke Rojhilatê Kurdîstanî û Îran de vera mamostayan dewam kenê de, pare kerdî. Goreyê xebera Kolbernewsî, cezayê ke dîyabî mamostayanê Kurdan ê bajaranê Seqiz û Sîneyî ra Mecîd Kerîmî, Xeyas Nîmetî, Nesrîn Kerîmî, Feysel Nûrî û Şehram Kerîmî rê, hetê Dayîreya 31. ya Buroyê Îxlalanê Îdarîyan ê Wezaretê Perwerdeyî yê Îranî ra ameyî tesdîqkerdiş.
Xebere de ame vatiş ke cezaya dûrîvistişê wezîfeyî ya ke dîyabî Selah Hecî Mîrzayî, ameya betalkerdiş û dosyaya dewaya ey seba ke prosesê newe ra muhakemekerdişî dest pêbikero, şawîyaya Heyetê Cigêrayîşê Îxlalanê Îdarîyan.
Ame vatiş ke, mamostayan ra Şehram Kerîmî rê 6 aşmî dûrîvistişê wezîfeyî, Mecîd Kerîmî û Xeyas Nîmetî rê îxrac, Nesrîn Kerîmî rê bi zorî teqawutkerdiş, Feysel Nûrî rê zî 5 serrî dûrîvistişê wezîfeyî sey ceza ameyo dayene.
Meclîsê Mamostayan ê Sîneyî, 21ê Tebaxe de eşkerayîya ke dabî û îlan kerdbi ke; bajaranê Sîne, Seqîz û Dîwandereyî ra 14 mamostayanê Kurdan ê bi nameyanê Mecîd Kerîmî, Xeyas Nîmetî, Selah Hacî Mîrzayî, Nesrîn Kerîmî, Leyla Zarî, Feysel Nûrî, Perweyz Hesenî, Kawe Mihemed Zade, Hîwa Qureyşî, Umêd Şamhemedî, Şehram Kerîmî, Luqman Ela Muradî, Suleyman Ebdî û Mehyedîn Reyhanî rê hetê Heyetê Îxlalanê Îdarîyan ê Wezaretê Perwerdeyî yê Îranî ra cezayê ‘bi zorî teqawutkerdiş û dûrîkerdişê wezîfeyî’ amey dayîş.
