ZAZAKÎ NEWS – Parlamentera Êlihî ya DEM Partî Zeynep Oduncu Kutevî, hesabê xo yê Xî ser o bi parekerdişê vîdeoyêk da zanayîş ke karkeranê demserre ê ke qezaya Sêwregi ya Rihayî ra yê, qezaya Bora ya Nîğdeyî de rastê hêrişêkê nîjadperestî ameyê.

Ame zanayîş ke karkerê birîndarî şawîyayê Nêweşxaneyê Cigêrayîş û Perwerdeyî yê Nîğdeyî.

Oduncu Kutevî dîmenê wextê hêrişî hesabê xo yê medyaya komelkî ser o pare kerdî.

“No hêriş zerar dano prosesê aştîye”

Parlamentera DEM Partî parekerdişê xo de no hêriş sey ‘faşîstî’ name kerd û va:

“Vera hemwelatijanê ma yê ke Sêwregi ra sey karkeranê demserre şîyê Nîğde, vera înan hêrişêko faşîzan ame meydan.

Hêrişê ewroyî bi hawayêko eşkera ramojneno ke asayîşê canê hemwelatijanê ma nêameyo temînkerdiş.”