Enwer Yilmazî nê kitabê xo bi lehçeya Zazakî “BENA HOL” nuşto û no kitab, kitabê ey o dîyin o. Kitabê Enwer Yilmazî yo yewin (Ti Dejêko Bêwayîr î) serra 2014î de ame çapkerdene. No kitab, “BENA HOL” kitabê ey o dîyin o.
Kitabê Enwer Yimazî “BENA HOL” 153 rîpelî yo û mîyan de 12 hîkayeyî estê. Yilmaz derheqê kitabê xo de vano ke: 'No kitab de zî behsê cuyayîşê ma Kurdan beno. Hîkayeyê ma Kurdan nêzdîyê yewbînan ê. Zaf manenê yewbînan. Dewletanê serdestan timî cuyayîşê ma kerdo lete û heram. Derd û dejê şarê ma zaf ê. Neheqî, feqîrî, bêedaletî û bindestî sey qederî ma rê ameyê ferzkerdene. Erdê ma lete, ziwanê ma lete, şarê ma parçe û o tewr xirab zî sîyasetê ma parçe yo. La ma zanenê ke, no qederê ma Kurdan nîyo. Mi kitabê xo de bi hîkayeyan behsê na bindestî û neheqî kerda. Tayê hîkayeyan de ez qala xo kena la mîyanê ê hîkayeyan de zî onca hîkayeya ma Kurdan esta.'
Yilmaz vano ke, wexto ke merdim nê çîyan ser o nuseno zaf dej anceno û wina dewam keno: 'Ez demê nuştişê hîkayeyan de zaf bi dejaya. Seba ma Kurdan cuyayîş zaf zehmet o. Wexto ke merdim nê zehmetîyan nuseno zî zaf zehmetî anceno. Qederê ma û neheqîya ke ma rê bîya zaf giran a. La ma mecbur ê ke behsê nê çîyan bikerê. Eke ma nênusê, ma raştîya xo ra dûrî kewenê. Lazim o na raştîya ma bibo babeta edebîyatî. Xora edebîyat bi nê çîyan xo keno weye. Xeylê nuştoxê ma zî wina kenê. Xora bi Kurdkî nuştiş tena seryê xo çîyêko muhîm û bimbarek o. Xoverdayîşo tewr pîl Kurdkî nuştiş o. Merdim bi ziwanê xo binuso, biwano û bi ci xebate bikero, mucadeleyo tewr pîl o yo.'
Yilmazî qale arde rewşa Lehçeya Zazakî ser û va: 'Seke yeno zanayene halê ziwanê ma baş nîyo. Polîtîkayanê asîmîlasyonî ver ziwanê ma roj bi roje helîyeno. Eke tedbîrê cîddî nêrê girewtene, no ziwano qedîm û weşik siberoj vîndî beno. Dezgehê UNESCOyî zî raporê xo de îzah kerdo ke, no ziwan ver bi mergî şono. No çîyêko zaf bitehluke yo. Lazim o ma vernîya nê asîmîlasyonî bigîrê.. Çi rojname çi televîzyon çi edebîyat çi sînema... Ferq nêkeno. Ganî ma pawê dewlete nêvindê. Xemê dewlete nîyo ziwan merdo yan nêmerdo, esto yan çin o. Xora dewlete qayîl a wa ziwanê Kurdî bimiro. Gerek ma zor bidê îmkananê xo. Gerek ewilî ma bi xo wayîrê ziwanê xo bivejîyê. Ma bi ziwanê xo binusê, temaşe bikerê, qisey bikerê û aver berê.'
