ZAZAKÎ NEWS - Vizêr, kombîyayîşê Komîsyonê Hemkarîya Mîlî, Birayî û Demokrasî bi serekîya Serekê Meclîsî Numan Kurtulmuşî de virazîya. Kombîyayîş de, bi nameyê Mayanê Aştîye, Nezahat Teke, Rabia Kiran û Turkiye Bozkurt ameyî goştarîkerdiş. Labelê, waştişê qiseykerdişê bi Kurdkî yê Nezahat Teke û Rebia Kirane hetê Numan Kurtulmuşî ra nêamebi qebulkerdiş.
Sazîyê Kurdî zî vera nê qedexeyî razînêbîyayîşê xo mojna. Komeleya Cigêrayîşanê Ziwan û Kulturê Mezopotamya (MED-KURDÎ) zî yew beyanat da û waşt wa qedexeyê sere ziwanî bêrê wedaritiş.
Beyanatê MED-DERÎ wîna yo:
RAYA PÊROYÎ RÊ
Komîsyon çira bi kurdkî qiseykerdişî qedexe keno? Rêzimanê Meclîsî çira verê bi kurdkî qiseykerdişî de bena asteng? Bi Kurdkî qiseykerdiş çira Dayîkanê Şemeyî û Dayîkanê Haştîye rê êno qedexekerdiş?
Senî ke êno zanite, vengdayîşê Haştî ê Komelê Demokratîk ra dima, çarçiwa prosesê çareyî de Meslîsê Tirkîya de komîsyonêk ame ronayêne. No çend o ke nê komîsyonî dest pê xebate kerdo û hîdî hîdî bi kes, sazgeh û dezgehanê muxataban reyde dîyarîyan keno. Na çarçiwa de Dayîkê Şemeyî û Dayîkê Haştiye zî amey dawetkerdene û wexto ke mesela ameye bi kurdî xo îfadekerdişî ser, çade hişmendîya seserran a çinbîyayişê hesibnayene, înkar û asîmîlasyonî reyna riyê xo musna û rêzimanê meclîsî xo rê kerde mane û bi kurdî qiseykerdiş qedexe kerd. Bêçare tirkî qisey kerd û uca de kewtî binê zextê îdîaya înkarî.
Ewro ke mebo key? Madem ke no komîsyon bi îradeyê çareyî kom bîyo, do bîngehê virnayîşê qanûnan amade bikero, pêşnîyaran bikero û seba haştî, têduştî, miyan ra wedaritişê neheqîyan bixebetîyo, o taw no keraset çi yo? Do key û senî ziwanê kurdî bêro dîyene, heqê ziwanê kurdan bêro naskerdene û têduştî senî virazîyo?
Ma sey sazgehanê ziwanê kurdî nê helwêstê qedexeker û înkarîkerî şermezar kenîme. No vera ziwan, estîyayiş û nasnameyê ma bêtehemulî ya. Ganî pêro wextê ma de, pêro sazgeh û dezgehanê resmî de astengîyê vera ziwanê kurdî bêrê wedarîtene û her kes bi ziwanê xo yê dayîke, bi serbestî xo biyaro ziwan û biciwîyo. Ma vênga komîsyonî danîme ke helwêstê zafziwanî, zafkulturî binayê xo û zirar medo, la hêviya komelkî û hêviya şarî ya haştîye. Ma reyna anîme rayadarên vîrî ke êdî şarê kurdan verdibîstane ra heta unîversîteyan perwerdeyî bi ziwanê xo wazeno, çend heno ke statuyê kurdî bigîrîyo bîngehê ganî heta niha ke nê waştişî nîyameye caardene, şarê kurdan do têkoşinê ziwanê xo ra fek ra meverdo.
Bê kurdî haştî nêbena! Tena bi perwerdeyî û statuya kurdî têduştiş mumkîn a! Perwerdeyî bi kurdî, statuya kurdî!
SAZÎYÊ ZIWANÊ KURDÎ
