ZAZAKÎ NEWS – Serekdozgerîya Komare ya Kuçukçekmeceyî, çarçeweya tehqîqato ke vera Can Holdingî dîyayo destpêkerdiş de, derheqê 10 kesan ke mîyanê înan de Mehmet Şakîr Can, Kemal Can û Kenan Tekdağ zî estê, bira tepiştişî da.
Tehqîqat, bi îthamê “awankerdişê rêxistina sûcan”, “qaçaxçîtîye”, “sextekarîye” û “pakkerdişê pereyan” yeno rayraberdiş. Na çarçewe de, dest ronîya 121 şîrketanê ke besteyê Can Holdingî yê ser. Mîyanê înan de Haberturk û Show TV zî estê.
Ame zanayîş ke, şîrketê ke dest ronîyayê ser, dewrê Fonê Sîgortaya Depozîtoyan a Teserufî (TMSF) ameyê kerdiş.
Turgay Cînerî, serra 2024î de, pêro hîseyê xo yê medyayî, ke mîyanê înan de HaberTurk û Show TV zî estbîyî, dewrê Can Holding kerbi û xo sektor ra antbi.
Mîyanê sazîyanê ke besteyê Can Holdingî yê de, Unîversîteya Bîlgî, Kolejê Doğayî, istasyonê benzînî yê Energy, Awox, Nêweşxaneyê Medîzayî û Otelê Golden Hillî zî estê.