Abdullah Ocalanî pêvînayîşê xo yê bi Heyetê Partîya DEMî reyde îfade kerd ke bê Partîya DEMî tu îttîfaq nêeşkeno biser bikewo û va, “Potansîyelê Partîya DEMî nezdîyê %20î de yo.”
Goreyê xebera Ajansê Welatî, Goreyê malumatanê ke Heyetê Partîya DEMî pare kerdê, Abdullah Ocalan hedîseyanê cimatkîyan nêzdî ra teqîb keno. Ame vatiş ke Ocalanî bale anta ser pêrodayîşanê ke serranê peyênan de mabênê keyeyan, bajaran û eşîran de zêde bîyê û na babete de vengdayîşê hesasîyetî kerdo.
Ocalanî bi taybetî îşaretê hedîseyanê Wanî û xeylê bajaranê bînan kerd ke tede problemê qijkekî benê sebebê şîdetî û no hal tesîrêko xirab aştî û aramîya cimatkî ser o keno.
"Vera yewbînan fek çekan ra veradê"
Ocalanî veng da pêro kesanê ke goş danê ey ke wa probleman bi aqil û qiseykerdişî çareser bikerê û wina va:
"Ez seba kesanê ke goş danê mi vana ke vera yewbînan de bi awayêko exlaqî fek çekan ra veradêne. Ganî qiseyanê ke yewbînan bidejno zî nêvajê. Ez şîdetê mîyanê keyeyî, mabênê keyeyan, mabênê eşîran û mabênê cimat û bajaran red kena, teberê exlaqî vînena."
"Potansîyelê Partîya DEMî %20 yo"
Abdullah Ocalanî sebebê şîdetî sey "bêorganîzebîyayîş" nîşan da û bale ante ser rolê Partîya DEMî Ocalanî îfade kerd ke mucadeleyo tewr pîl o demokrasî, organîzekerdişê şarî yo û wina dewam kerd:
"Potansîyelêko pîl ê Partîya DEMî esto. Ganî xo ra bawer bê. Partîyêka tesîrker a. Îttîfaqê Cumhûrî yê Miletî zî bêro serê karî, bê Partîya DEMî nêbeno. Seba ney ganî cimatî organîze bikero û xo ra bawer bo. Potansîyelê ci nezdîyê %20î de yo."
