Serekê CHPyî Ozgur Ozelî vizêr Anqara de kombîyayîşê çapemenîye viraşt û behsê pêrodayîşê mabênê hêzanê Şamî û Hêzê Surîyeya Demokratîke (HSD) yê mehleyanê Kurdan ê Helebî kerd.
Ozgur Ozelî va, "Sey CHPyî, ma paştî danê yewparçeyî û aramîya erdê Sûrîye. Ma pîyameyîşê 10ê Adare muhîm vînenê û wazenê ke hetî bê şer û pêrodayîş, mase ser o pê bikerê."
Serekê CHPyî veng da Anqara ke rayîranê dîplomasîye teqîb bikero û seba çareserîya bêşerî û pawitişê sîvîlan însîyatîf bigîro.
Ozelî wina dewam kerd:
“Ganî seba çareserkerdişê persa Kurdan gamê lezgînî bêrê eştiş. Lazim o ke Tirkîyayêka bêteror û demokratîke wextêko tewr kilm de bêra awankerdiş."
Ozelî derheqê rewşa zereyî ya Sûrîye de zî hişyarî da ke ganî herême ver bi şerî nêra kaşkerdiş û îfade kerd ke lazim o Sûrîye de yew sîstemo demokratîk awan bibo ke tede pêro dîn û nasnameyê cîyayî çarçeweyê qanûnê bingeyênî de bi azadî biciwîyê.
