Endamê Heyetê Îmraliyî yê Partîya DEMî ke mîyan de parlamentera Wanî Pervîne Buldan, parlamenterê Rihaye Mîthat Sancar û awûqatê Buroyê Huqûqî yê Seserre Faîk Ozgur Erolî estbî, derheqê prosesê aştîye de zîyaretanê xo yê partîyanê sîyasîyan domnenê.
Endamanê heyetî Merkezê Pêroyî yê CHPyî de bi Serekê Pêroyî Ozgur Ozelî reyde pêvînayîş viraşt. Pêvînayîşê Heyetî û Ozelî yew saete ra zêdeyêr dewam kerd. Dima pêvînayîşî, Heyet û Ozgur Ozelî eşkerayî da çapemenî.
Ozel: Ganî heqê pêro neteweyan bêrê naskerdene
Verê cû Ozgur Ozelî qisey kerd û bi şermezarkerdişê heqaretanê cînsîyetperest û nîjadperestan ê Bursasporî yê vera Leyla Zanaye dest bi qiseykerdişê xo kerd. Ozgur Ozelî wina va: “Komîsyon merheleyê amadekerdişê raporî de yo. Ma hêvî kenê ke yew raporo ke her kes qebul bikero bivejîyo û proses netîce bigîro, dejî biqedîyê û brayîyêka dayîmkî bêra awankerdiş. Ganî hem Tirkîya de hem zî Sûrîye de seba Kurdan, Tirkan, Durzîyan û pêro hetan, heqê pêro netewe û bawerîyan bêrê dayîş. No do seba pêro şaranê Rojhelatê Mîyanênî baş bo.”
‘Ganî ma aştîye sey dîyarî bidê pêro hemwelatîyan’
Pervîne Buldanê zî îfade kerd ke pêvînayîşê înan baş netîce girewto û wina va: “Ma merheleyê prosesî ser o qisey kerd. Nê prosesê tarîxî de ma paştîdayîşê pozîtîfî yê CHPyî zaf muhîm vînenê. Semedê şerî ra no welat de zaf dejî ameyî antene. Cîwanî kewtî binê herre. Seba ke nê dejî biqedîyê, ganî her kes nê barî bido milê xo ser. Mesulîyetê ma pêroyînan o yo ke ma aştîye sey dîyarî bidê pêro hemwelatîyan.”
