Panelê Mehkemeya Heqanê Merdiman a Ewropa (MHME) muracatê Tirkîya yo ke seba newe ra ercnayîşê qerarê Selahedîn Demîrtaşî kerdbi, red kerd. Bi nê qerarî, qerarê MHME yê derheqê binpaykerdişê heqan û veradayîşê Selahedîn Demîrtaşî de qetî bi.
Wezaretê Edaletî yê Tirkîya aşma verêne, rojeke verî ke wext biqedîyo, vera qerarê MHME yê derheqê binpaykerdişê heqan û veradayîşê Hemserekê Pêroyî yê verênî yê HDPyî Selahedîn Demîrtaşî de îtîraz kerdbi. Wezaretî, îtîrazê xo de waştibi ke wa qerarê MHME yê derheqê Demîrtaşî de hetê Dayîreya Pîle ya MHME ra newe ra bêro ercnayene.
Avûkatê Demîrtaşî Mahsûnî Karamanî, dima ke Wezaretê Edaletî îtîraz kerd, hesabê xo yê X ser o mesajêk weşanabî. Karamanî mesajê xo de vatibi: "Wezaretê Edaletî vera qerarê MHME yê serê Demîrtaşî de îtîraz kerdo. Seba ma çîyo esas aştî ya, birayî ya, huqûqê birayîye yo; çi beno wa bibo, ma do nê îdealanê xo ra fek vera medê."
DEM Partî ra eşkerayîye
DEM Partî hesabê xo yê medyaya sosyale ser o derheqê babete de eşkerayîyêk weşana.
Eşkerayîye de ame vatene: "Seke ke yeno zanayîş, MHME qerarê xo yê 8ê Temmuza 2025î de yê derheqê tepiştişê neheqî yê Demîrtaşî yê Dewaya Kobanê de, heme neheqîyê ke muhakembîyayîş de estbîyî eşkera kerdbî. MHME dîyar kerdbi ke tepiştişê Demîrtaşî bi sebebanê sîyasîyan dewam keno û ganî o bêro veradayîş.
Pêvînayîşê MHME yê ewroyî de, no îtîrazê Tirkîya ame redkerdiş. Bi no qayde qerarê derheqê Demîrtaşî de qetî bi. Ganî esasê qeraranê MHME yê hetanî nika û bi taybetî esasê qerarê qetî yê 8ê Temmuza 2025î ser o, sere de Selahedîn Demîrtaş û Fîgen Yuksekdag, heme embazê ma ca de bêrê veradayîş."