Beledîyeya Bajarê Girdî ya Dîyarbekirî ke destê qeyûmî de ya, semedê, beyraq, defter, qeleme, çente û silayîyeyan 44 milyon û 815 hezar û 460 TL yewna îhale kerd.
Qeyûmê Beledîyeya Bajarê Girdî ya Dîyarbekirî hetêk ra verê weçînayîşê 31ê Adare merdimanê xo gêno beledîye hetêk ra zî pereyanê beledîya vila keno.
Qeyumî bi nameyê "Çapkerdiş û daşinasnayîş" 14ê Kanûna 2023î de îhaleyêka pîle kerd. Malîyetê ci zî 46 milyon û 796 hezar û 876,88 TL bi. Demê îhale sey 270 rojî ame bewlîkerdiş û semedê îhale hîrê teklîfî ameyî. La ê teklîfan ra tena hebêk qebûl bi û ê bînî ameyî betalkerdiş.
40 hezar çente, 300 hezar broşurî
Goreyo ke ame zanayîş îhale bi ercê 44 milyon û 815 hezar û 460 TL dîya 2 şîrketan.
Mîyanê îhale de hezar hebî beyraqî, 30 hezar çente, 20 hezar imsakiye, 300 hezar broşur, 7 hezar 500 davetiye, 7 hezar 500 zarf, 5 hezar ajanda, 6 hezar kelem, 10 hezar şuşe, 4 hezar û 500, 200 plaket, 10 hezar puzzle, 10 hezar kitab, 5 hezar poşet, 4 hezar sticker estê.
Şîrketo ke emser îhale girewt par zî eynî îhale girewtbi.
