10 bajaranê Kurdan de semedo ke qeyûmî nêrê protestokerdiş qedexe ameyo îlankerdiş.
Sere de Colemêrg û Dîyarbekir, zaf şaristananê Kurdan de semedo ke wa vera qeyûmam vengê xo nêvejê, heme protestoyî ameyê qedexekerdiş.
Vizîr hukmatê AK Partî şaredarîya Colemêrgî (Hakkari) rê qeyûm tayîn kerdbi. Serekê Beledîya semedo ke 10 serrî verê cû ci rê dewayêk ameya akerdiş wezîfe ra ame girewtiş û erzîya hepisxane. Walîyê Colemêrgî şi cayê serekê Beledîya de nişt ro.
Hukmatî nika zî herêma Kurdan de semedo ke wa çew vengê xo nêvejo OHAL îlan kerd.
Bedlîs, Wan û Şirnex de heme çalakî, rayşîyayîşî û beyanatî heta çend rojî yesax bîyê
Walîtîya Bedlisî 10, ya Wanî 5 û ya Şirnexî 5 rojî qedexe îlan kerd.
Heto bîn ra Colemrgê de 10, Diyarbekir de 4, Sêrt de 7 û û Mêrdîn de zî 7 rojî hema vaje her çî bîyo yesax.
Parlementerî verê şaredarîya Colemêrgî de nobete de yê
Heto bîn ra gelêk parlementer û serekê Şaredarîyanê DEM Partî emşo hetanî serê sibayî Colemêrg de nobete girewtî.
Ewro zî bi beşdarîya Hemserekanê Pêroyî yên DEM Partî, heyeta CHP û gelêk sazîyanê sivîlan do rayşîyayîşêk bêro kerdiş.
Protestoyê ke vizîr vera tayînkerdişê qeyûmî hetê DEM Partî ra dîyaybî destpêkerdiş dewam kenê.
Hemserekê DBP Çîgdem Kiliçgûn Uçar û Keskîn Bayindir, Hemşaredara Dîyarbekirî Derra Bucake û parlamenterê DEM zî mîyan de zaf kesî emşo hetanî serê sibayî nobete girewtî.
Heto bîn ra ewro do zaf bajaranê herême û Tirkîya de protestoyî bêrê kerdiş û qeyûmî bêrê protestokerdiş.
