Rêxistina Heqanê Merdiman a Îranî (IHR) eşkera kerd ke hêzanê asayîşî bi çekanê giranan sey doçka û BKC hêrişê çalakgeran kerd. Hûmara merdeyan resaye 3 hezar û 428î, hûmara dest bendkerdeyan zî 20 hezarî vîyarna.
Rêxistina Heqanê Merdiman a Îranî (IHR) ragihand ke mîyanê 3 rojan de hêzanê asayîşî yê Îranî bi doçka û BKCyan hêrişê çalakgeran kerdo û "qetlîam" viraşto.
Goreyê daneyanê IHRyî, heta nika 3 hezar û 428 kesî ameyê kiştene.
Rêxistina Heqanê Merdiman a Îranî ke merkezê ci Norweç de yo, rapora xo ya newîye de eşkera kerd ke mabênê 8 heta 11ê Çeleyê 2026î de, hêzanê asayîşî yê Îranî şaro ke kuçeyan de yo û protesto kedo "qetil kerdo."
Rapor de ame vatiş ke çîyo ke Îran û Rojhelat de esto "hukmê leşkerî yo" û "çalakgerî bi awayêko sîstematîk yenê kiştiş."
"Seba ke nêaşnawîyo, înternet birnayo"
Rêxistina Heqanê Merdiman a Îranî (IHR) wina va:
"Belge û zanayîşê ke destê ma de estê û isbat kenê, hukmatê Îranî bi birnayîşê înternetî waşto ke qetlîamo ke hedef kerdo bîyaro ca, ke wa vengê înan nêro eşnawitiş."
IHRyî derheqê humara tepişteyan de zî va ke 20 hezarî ra zêdeyêr çalakgerî ameyê dest bendkerdene û seba înan tehlukeyê cezayanê giran, bi taybetî zî tehlukeyê îdamî esto."
