Rojê Kultur û Hunerî yê Dêrsimî yê Mehmet Çetîn-Emîralî Yağanî, yê ke emser reya 4. yenê viraştene, dest pêkerdî. Rojê kultur û hunerî yê ke do 2 rojî dewam bikerê, Kitabxane û Salonê Konferansî yê Huseyîn Guntaşî de dest pêkerdî. Hemşaredarê Dêrsimî yê ke cayê înan rê qayûm amebî tayînkerdene û wezîfe ra ameybî girewtene û xeylêk kesî tewrê çalekîye bîyî.
Çalekîye, bi qiseykerdişê akerdişî yê Derhêner Devrîm Tekînogluyî dest pêkerde. Tekînogluyî îfade kerd ke ê seba ke yad, vîrameyîş û eserê ke Mehmet Çetîn û Emîralî Yağanî afirnayê û viraştê bidê şinasnayene.
Qiseykerdişê akerdişî ra dima, derheqê Rojê Kultur û Hunerî yê Dêrsimî yê Mehmet Çetîn-Emîralî Yağanî de vîdeoyo bi nameyê "Vîrameyîş o, nê fotrafî biweşne" ame mojnayene.
Çalekîye de, panelo bi sernuşteyê "Vîyarnayîşê Kulturê Vatî yê Dêrsimî yê Mîyannifşan" virazîya ke moderatorîya ey Nuştox Huseyîn Ayrilmazî kerd û Nuştox Daîmî Doğan û Cigêrayox-Nuştox Mesut Ozcan sey qiseykerdoxî ca girewt.
‘ZIWANÊ XO VÎRÎ RA KERD, KULTURÊ XO RA DÛRÎ KEWTÎ’
Cigêrayox-Nuştox Mesut Ozcanî ke tîya de qisey kerd, îfade kerd ke komelî eşkenê bi ziwanî kulturê xo biciwîyê û va: " Çi heyf ke neslê ma, sebebanê sey asîmîlasyon û xerîbî kulturî ra ziwanê xo vîrî ra kerd. Senî ke ma ziwanê xo vîrî ra kerd, ma kulturê xo ra zî dûrî kewtî. Ma gelo prosesê ameyî de seba ke ziwan û kulturê xo bipawê, eşkenê se bikerê? Ganî ma nînan ser o bifikirîyê û munaqeşe bikerê."
MOJNAYÎŞÊ BELGEFÎLMÎ
Ey ra dima, fîlmê belgeyî yo bi nameyê "Eke Ê ke Mendî zî Bişêrê" ke derhênerîya ey Huseyîn Keteyî kerda, ame mojnayene.
Rojaya 1. ya çalekîye bi estanik, şîîr û konsera Berfîn Işike û hunermendanê herêmîyan qedîyaye.