Şewa bîne polîsan eşt Şaredarîya Colemêrgî ya DEM Partî ser û serê sibayî zî şaristanê Wanî de Hemşaredar Mehmet Siddik Akiş destbend kerd.
Netîceya weçînayîşanê 31ê adare de namzedê DEM Partî Mehmet Siddil Akiş bibi hemşaredarê Colemêrgî. Akiş serê sibayî Wan de ame destbendkerdene. Dima şaredarîye gêrîyaye binê ablûqa.
Wezîrîya Karanê Zereyî pare kerd ke Şaredarîya Colemêrgî ya DEM Partî rê qeyûm ameyo tayînkerdene. Wezîrîye va ke, bi îdîayanê 'endamî, propaganda û îdarekarîya rêxistine' derheqê Akişî de dosyayê dewa estê.
Derheqê Akişî de bi îdîaya 'endamîya rêxistine' tehqîqatêko newe zî ame akerdene.
Qeyûm ame tayînkerdene
Walîyê Colemêrgî Alî Çelîk zî sey qeyûm ame tayînkerdene.
Avûkatê Akişî Azad Onerî derheqê rewşa muwekîlê xova: ''Dosya ser o qirarê nimitişî est o. Tehqîqat 'bi hawayêko nimite' yeno kerdene. Eşkera yo dozgerîye û hêzanê asayîşî pîya dosya amade kerda.''
Hemserekanê DEM Partî ra beyanat
Hemserekanê Pêroyî yê DEM Partî Tulaye Hatîmogullari û Tuncer Bakirhanî hesabanê xo yê medyaya dîjîtalî de vera tayînkerdişê qeyûmî de razînêbîyayîşê xo mojna.
Bakirhanî vat: ''Destbendkerdişê Hemşaredarê Colemêrgî bêhuqûqî yo. Ma na dişmenîya vera kurdan red kenê. Ma do îradeyê xo nêdê destê çewî. Hinî bes o. Ma venga pêro şarê xo, kesanê demokratîkan, aştîwazan û şorişgêran danê ke wa hetê şarê Colemêrgî de vinderê.''
Tulaye vat: ''Îqtîdaro ke sindoqan de vîndî kerd gêreno ke îradeyê şarî xesp bikero. Ma do verê na hişmendîya qeyûman de sereyê xo nêarê war. No hêriş teyna vera îradeyê Colemêrgî ney vera îradeyê şaranê Tirkîya ame kerdene. Êyê ke demokrasî wazenê wa vera na hişmendîye vengê xo vejê.''
