Komeleya Nuştoxanê Kurdan, PENa Kurd û Yewîya Weşangeranê Kurdan (YEW-KURD) derheqê Furarê Kitaban ê Amedî yê 9inî o ke do 18-26ê Teşrîna Verêne de bêro viraştene, kombîyayîşêkê çapemenîye viraşt. Endamê Komeleya Nuştoxanê Kurdan, PENa Kurd û YEW-KURDî tewrê kombîyayîşê çapemenîye bîyî. Kombîyayîş banê komele de ame viraştene. Hemsereka YEW-KURDî Asya Genim bi Kurmancî, Hemserekê Komeleya Nuştoxanê Kurdan Hacî Ozkalî zî bi Zazakî eşkerayîye wende.
‘Xeylêk nuştoxê kurdî do tewrê ci bibê’
Asya Genim derheqê fuarê kitaban de o ke do 18-26ê Teşrîna Verêne de bêro akerdene, qisey kerd û vat: “Ma do 18-26ê Teşrîna Verêne de Amed de Furarê kitaban (Tüyap) virazê. Weşanxaneyê kurdkî bi kitaban, nuştoxan û bi helwesta xo ya kurdkî do tewrê nê fuarî bibê. Seke ma zanê, xebatê kultur û ziwanî heme beşanê komelî eleqedar kenê, bi hewldan û xebatanê tayê sazîyanê kurdkî, nuştoxan, weşangeran û rojnamegeran problemê ziwanî û asîmîlasyonî heta cayêk yena çareserkerdene. Komelê kurdan bi heme beşanê xo, bi sîyaset, ekonomî, medya, sazî û dezgeyanê xo mesulê ziwanê xo yê. Ganî goreyê muhîmîya nê mesulîyetî hereket bikerê.”
‘Ma pîya wayîrê vîrê xo vejîyê’
Asya Genime armancê fuarî ser o wîna va: “Her merdimo hişmend û zanaye hol zano ke; merdim hewcedarê ziwanî yo. Komelo bêziwan bê kok o, bêvîr o, komelo ke vîrê ey bîyo vindî game bi game ruhê azadîye ra dûrî keweno. Bêrê ma pîya wayîrê vîrê xo vejîyê. Wendiş averşîyayîşê hişê merdimî û hişê komelkî de hereketo tewr bi tesîr o. Averşîyayîşê komelî xo goreyê wendişî virazeno. Wextê ma, ekonomîya ma seba her karî bes a, ma wextê xo û ekonomîya xo layîqê her karî vînenê. La wendiş û herînayîşê kitaban de ma çikûsîya wextî û çikûsîya herînayîşî kenê.”