ZAZAKÎ NEWS - Mudurîya Pêroyî ya Perwerdeyê Bingeyênî ya Wezaretê Perwerdeyê Neteweyî (MEB), 5ê Sibata 2026î de mekteban rê nuşteyêko fermî şawit û waşt ke wa prosesê weçînayîşê dersanê wendekaranê sinifa (pola) 5, 6, 7 û 8an bi dîqet bêro ramitiş.
Prosesê weçînayîşê dersanê weçînayeyan, seba mektebanê mîyanênan serra perwerdeyî ya 2026-2027î de dewam keno. Muracatî do 20ê Sibata 2026î de biqedîyê.
Rayberîyanê mekteban waşt ke wa keyeyî en erey heta 20ê Sibate muracatê xo bikê.
Seba dersanê Kurdkî şertê '10 wendekaran'
Serra 2012î ra nat, ziwanê Kurdkî (Kurmancî û Zazakî) sey dersa weçînayeye mektebanê mîyanênan de dîyeno wendene. Seba ke yew sinife bêra ronîyayîş, ganî tewr tay 10 wendekarî dersa Kurdkî biweçînê.
Eke no şert bêro caardiş, wendekarî do bieşkê hewte de di saetî ziwanê xo yê dayîke de perwerde bigîrê. Eke hûmara muracatan yew mekteb de 10î ra kêmî bo, seba a lehçe derse nêna akerdene.
Par nezdîya 60 hezar wendekaran Kurdkî weçînabî
Goreyê daneyanê ke Gulana serra vîyarteyî ameyê weşanayene, pêro pîya 59 hezar û 362 wendekaran seranserê Tirkîya de seba serra perwerdeyî ya 2025-2026î dersa ziwanê Kurdkî weçînabî.
Mîyanê nê wendekaran de 50 hezar û 809 kesan Kurmancî û 8 hezar û 563 kesan zî Kirmanckî (Zazakî) weçînabî.
