ZAZAKÎ NEWS - Bi wesîleyê 21ê Sibate (Gucige) Roja Ziwanê Dayîke ya Dinya, Amed de çalakîyêke ameye viraştene. Wekîlê Amedî yê Partîya DEMî Serhat Eren û endamê Meclîsê Ziwanê Kurdkî, verê bînaya PTTyî de eşkerayîya çapemenîye da û waşt ke sere de Kurmancî û Zazakî, lehçeyê Kurdkî bêrê pawitene û binê garantîya qanûnê bingeyênî de bê.
Çalakîye de, seba pawitişê lehçeya Kirmanckî (Zazakî, Kirdkî/Dimilî) ke sey "binê tehlukeyê vîndîbîyayîşî" de yena vînayene, ame waştiş ke gamê zelalî bêrê eştene.
Dima eşkerayîye, UNESCO, Serekkomarîye û Wezaretê Perwerdeyê Neteweyî rê mektubî ameyî şawitiş û ame waştiş ke wa nê ziwanî bêrê pawitene û binê garantîya qanûnê bingeyênî de bê.
"50 mîlyon Kurdî estê la ziwanê înan qebul nêbeno"
Wekîl Serhat Erenî qiseykerdişê xo bi Kurdkîya Kurmanckî kerd. Erenî îfade kerd ke o Roja Ziwanê Dayîke ya Dinya seba pêro şaran pîroz keno û eleqe ant ziwanê dayîke ser.
Erenî va, "50 mîlyon Kurdî estê la ziwanê înan nêno qebulkerdene. Eke yew ziwan cuyayîşê ekonomîk û sosyalî de nêro xebitnayene, do mîyanê tehlukeyê vîndîbîyayîşî de bimano.
Dima qiseykerdişan, kesanê ke tewrê çalakîye bîyî, UNESCO, Serekkomarîye û Wezaretê Perwerdeyê Neteweyî rê mektubî şawitî û waşt ke Kurmancî, Zazakî û lehçeyê bînî bêrê pawitene.
