Huner

Şenol Akdağî ra albumo newe: Çar berhemê 'Piltan'

Abone Ol

ZAZAKÎ NEWS - Hunermend Şenol Akdağî, albumê xo yo newe "Piltan" o ke bi Zazakî amade kerdo ra çar berhemî vetî. No album, teberê xebata muzîkî ra, armanc keno ke ziwan û kulturo ke binê rîskê vîndîbîyayîşî de yo, bido cuyayene.

Çar berhemê verênî yê albumî; "Piltan", "Zeryam", "Derdi Derdi" û "Havada Kar Sesi Var", platformanê dîjîtalan de vila bîyî.

Album pêro heşt berheman ra yeno pê; şeşê ci bi Zazakî, di yê ci zî bi Tirkî ameyê qeydkerdene. Berhemanê Tirkîyan ra yew anonîm o, o bîn zî aîdê ozanê şarî yê Sêwasî Alican Çelîkî yo. Vate û muzîkê lawikanê "Zeryam" û "Piltan"î besteyê xoserî yê Akdağî yê.

Album de, melodîyê herêmî yê herêma Dêrsimî zî newe ra ameyê şîrovekerdene. Akdağo ke ozananê şarî sey Sey Qajî, Şah Heyderî, Bava Gulimî û Baba Dîlî ra îham girewto, îfade kerd ke ey xebata xo bi "rengê koyî, vengê erdî û vengê zereyî yê şarî" arda pêser. Akdağî vat ke album hem seba ziwanî hem zî seba cografya yew hurmetnîşanayîş o.

Şenol Akdağ kam o?

Şenol Akdağî, mabênê serranê 1996-2005î de Grûba Munzurî de xebatê xo yê hunerî kerdî, dima ra heyatê xo yê muzîkî de bi hawayo şexsî dewam kerd. Akdağî, albumê xo yo yewin o solo "Payiz" serra 2015î de vet. Dima ra, serra 2021î de "Bêvengiya Astaru" û "Yol Ver Dağlar", serra 2023î de "Bana Kendi Dilinden" û serra 2024î de zî albumê bi nameyê "Tarihin Irmağında" vetî.