Serekê Pêroyî yê Leşkerî yê Lîbya Orgeneral Muhammed Alî Ahmed Al Haddad, o ke dawetê Serekê Pêroyî yê Leşkerî yê Tirkîya Orgeneral Selçuk Bayraktarogluyî ser amebi Tirkîya, qezaya teyareyî de merd.
Teyareyo tîpê Falcon 50 yo ke serra 1988î de virazîyayo û tede Al Haddad zî tede, heşt kesî estbîy, wextanê şanî de, dima ke seba şîyayîşê Trablûsî Anqara ra perra, 19 deqîqeyan ra dima qezaya Haymanayî de kewt waro.
Enqazê teyareyî, dewa Kesîkkavakî ya qezaya Haymanayî ya Anqara ke Hewagehê Esenbogayî ra 105 kîlometre dûrî yo, ame vînayîş.
Serewezîrê Hukmatê Yewîya Neteweyîye yê Lîbya Abdulhamîd Dîbeybeyî eşkera kerd ke Al Haddad zî tede, pêro kesê ke teyare de bîy, merdê.
Teyare de Serekê Pêroyî yê Leşkerî yê Lîbya Al Haddadî zî tede, Fermandarê Hêzanê Bejayî yê Lîbya Korgeneral Futurî Grîbel, Fermandarê Sazîya Viraştişê Leşkerî Tûggeneral Mahmud Al Katavî, Şêwirmendê Serekê Pêroyî yê Leşkerî yê Lîbya Muhammed Al Assavî Dîyab, Fotografkêşê Serekîya Pêroyî ya Leşkerî Muhammed Omer Ahmed Mahcub û 3 personelê bînî estbîy.
Lîbya de semedê qeza 3 rojî şînê neteweyî ame îlankerdiş.
Tehqîqat ame destpêkerdene, Lîbya heyet şawit Tirkîya
Serekdozgerîya Komare ya Anqara derheqê kewtişê teyareyî de tehqîqat da destpêkerdiş. Wezîrê Karanê Zereyî Yerlîkayayî eşkera kerd ke saet 02.45 de cîhazê qeydê vengî yê teyareyî û saet 03.20 de zî qutîya sîyaye ameya vînayîş. Sebebê qezayî do netîceyê cigêrayîşanê teknîkîyan de bellî bibo.
Lîbya, seba ke tehqîqatî teqîb bikero, heyetêk şawit Anqara. Serekê Îrtîbatî yê Serekkomarî Burhanettîn Duranî waşt ke raya pêroyî derheqê qezayî de tena goş bidê eşkerayîyanê ke hetê meqamanê resmîyan ra yenê dayene.
