ZAZAKÎ NEWS - Mehelaya Hasan Çelebîyî de Lîseya Anadoluyî ya Teknîk û Pîşeyîye ya Ahmet Koyuncuyî de yew wendekarî bi tifing hêrîşê Lîseyêk kerd.
Hêrîşkaro ke guleyî verdayî nat-weta, wendekarî zî tede 16 kesî kerdî birîndar.
Îxbarî ser o ekîbê weşîye, polîs û herekatê taybetî sewqê Lîse bîyî. Hêrîşkar kewt zereyê mektebî û wendekarî rehin girewtî.
Walîyî eşkera kerd: Hêrîşkarî intîhar kerd
Walîyê Riha Hasan Şildakî va ke hêrîşkar wendekaro verên ê mektebî bîyo û serra 2007î de ameyo dinya. Şildakî da zanayîş ke birîndarî sewqê nêweşxaneyî bîyî û zêdeyê birîndaran wendekar ê.
Şildakî va ke, hêrîşkar wendekaro verên ê mektebî yo û sinifa 9. de perwerdeyê akerdeyî rê qeydê xo viraşto û hêrîşkarî bi çeka xo intîhar kerdo.
Walîyî wina va:
"(Hêrîşkar) Wendekaro verên ê mektebî yo, tena sinifa 9. de tîya de perwerde gêno. Dima ra prosesêkê perwerdeyî yo wina esto ke o qeydê lîseya akerde bîyo. Şexso ke 19 serrî yo, wexto ke hetê polîsan ra bi mudaxeleyî ameyêne tepiştene, ey peynî da weşîya xo.
Wezaretîya Karanê Zereyî ra eşkerayîye
Wezaretîya Karanê Zereyî, eşkerayîya xo ya derheqê babete de da zanayîş ke, hêrîşê çekdarî hetê O.K. yo 19 serrî ra bîyo û wendekaro verên ê mektebî yo.
Dewamê eşkerayîye de nê îfadeyî ca girewtî:
“Şexso ke hêrîş bi tifingê pompayin viraşt, hadîseye ra pey bi eynî çek intîhar kerdo. Derheqê hadîse de hetê yewîneyanê ma yê asayîşî ra cigêrayîşêko hîra dîyayo dest pêkerdene û averşîyayîşî do raya pêroyîye reyde bêrê parekerdene.”