ZAZAKÎ NEWS - Musebaqayê wendiş şîîranê kurdkî (Zazakî-Kurmanckî) yê ke Mêrdîn, Wan û Stenbol de virazîyenê, xizmetê ziwanî kenê û ziwanî mîyanê gedeyan de danê heskerdiş.
14 serranê peyênan de dersê kurdkî tay şaristanan estê. Sey nimûne; mekteban de sey "dersa weçînayeye" yena musnayîş û eynî wext de çend unîversîteyan de zî beşê kurdkî estê ke kurdkî nika akademî de zî ca gêna. Nê 6 serranê peyênan de programêkê tazî zî nê xebatan rê îlawe bi: Cayanê cîyayan de, bi bi eynî nameyî; Musebaqaya Wendişê şîîranê Kurdkî virazîyena.
Mêrdîn û heme qezayê ci
6 serrî yo ke Mêrdîn û heme qezayanê ci de bi îznê Walîyî, zafê mektebanê mîyanênan Musebaqaya wendişê şîîranê kurdkî benê. Par 28 mekteban de na Musebaqayî ameyî viraştiş û her mektebî ra 5 heta 20 wendekarî beşdar bîyî. Badê qedîyayîşê Musebaqayanê mekteban, her mektebî ra yew wendekar ame weçînayîş û Musebaqaya pêroyî amey viraştiş. 28 wendekarî verê jûrîya ke mamosteyanê Beşê Ziwan û Kulturê Kurdkî yê Unîversîteya Mêrdîn Artuklûyî ra yena pê, şîîrê xo wendî.
Musebaqa bi cil û berganê kurdkî amey viraştene û her çî bi hawayêkê fermî ame rayra berdene. Nika "Mektebê Zergan İmam Hatipî" serkêşîya na Musebaqa keno.
Emser zî do 21ê Gulane de, bi munasebetê "15ê Gulanî Roşanê Ziwanê Kurdkî", na Musebaqa bêro viraştene.
Wan û Stenbol de reya verêne
Wan de musebaqaya wendişê şîîranê kurdkî do emser reya verêne bi destê saziyanê sivîlan bêro viraştene. Enstîtuyê Ehmedê Xanî, Komeleya Nûbiharî û Akademy, bi munasebetê 15ê Gulane Roşanê Ziwanê Kurdkî, do 9ê Gulane de programêk virazê. Labelê na musebaqaya seba gedeyanê ke emrê înan 7 heta 15 o, derbazdar a. Gedeyî eşkenê bi viraştiş û şawitişê vîdyoyêk beşdar bibê û seba xelatan beşdarê programê 9ê Gulanre yê VAN TSOyî bibê.
Stenbol
Musebaqaya Stenbolî de prensîbê cîyayî estê. Wendekarî bi şertê "weçînayîşê dersa kurdkî" eşkenê beşdarê na musebaqaya bibê. Eynî wext de eşkenê hem bi nuşte û şîîran, hem zî bi lehçeya kirmanckî (zazakî) û kurmancî (kirdaskî) beşdarê musebaqaya bibê.
