Tornê Şêx Seîdî û Şaredarê verên ê Xinisî Hasan Basri Fırat, o ke Partiya Herêman a Demokratîke (DBP) ra amebî weçînayîş, bajarê Wuppertalî ê Almanya de krîzê qelbî ra şi heqîya xo.
Serokê Komelemeyê Şêx Seîdî Kasim Fıratî va: "Hasan Basri Fırat serra 2016î de Şaredarê Xinisî bi, cayê ey rê qeyyûm ame tayînkerdene. Ey rê 12 serrî cezaya zîndanî ameye dayene û mecbur mend ke şîyo teberê welatî."
Kasim Fıratî îzah kerd ke seba ardişê cenaze prosedurê qanûnî dewam kenê. Ame zanayîş ke Fıratî verê mergê xo pawitêne ke Meclîs de qanûno newe vejîyo û ageyro welatê xo.
