Arif Bulut

Seke zanîyeno  Wezaretîya Perwerdeyî ya Tirkiya aşkere kerdbi ke do emser 20 hezar mamosteyî bêrê tayînkerdiş. Labelê tenya 10ê înan mamosteyê Kurdkî yê. 20 hezar mamosteyan ra tenya 6 mamoste yê Kurmanckî û 4 mamoste zî yê Kirmanckî (Zazakî) yê.

Heto bîn ra semedê Almankî 288, semedê Erebkî 262 û  semedê Îngilîzkî zî 968 kontenjan ame akerdiş. Vajîyeno ke welato ke bi milyonan Kurdî tede cuyenê de tayînkerdişê  10 mamosteyan kêmî yo û şerm o.

Emser 20 hezar wendekaran dersa Kurdî weçînitibî. Semedo ke tutê Kurdan bieşkê bi ziwanê dayîke perwerde bigîrê lazim  o hûmara mamosteyan bêra zêdekerdiş. Hukmatê Tirkiya her serre 2 yan 3 mamosteyanê Kurdî tayîn keno.

Tena verê weçînayîşê 14ê Gulana 2023î  50 mamosteyê Kurdî ameybî tayînkerdiş û înan ra 35ê  înan mamosteyê Kurmanckî û 15ê înan zî mamosteyê Kirmanckî (Zazakî) bî.

Perwerdekaran na mesela ser o Zazakî Newsî rê qisey kerd

Perwerdekarê Dîyarbekirî çi vanê?

Seke zanîyeno cayo sey Dîyarbekirî de 418 hezar wendekarî estê. Ma zî derheqê no kontejano ke dîyayo Kurdkî ser perwerdekaran û şarî rê pers kerd.

Serekê Egitim Senî yê Dîyarbekirî yê Şûbeyê 2. Serhat Kılıç vano ke: “ Verî vatêne semedo ke Mamosteyî çîn ê ma nêeşkenê na derse bide. O wext bahaneyê înan wîna bi. Xora ma zenê, nika zî Wezîrê Perwerdeyî yê Millî aşkere kerd ke ê do 20 hezar Mamosteyan bigîrê û înan ra tena 10 hebî mamosteyê Kurdkî yê.  Goreyê nifusê Kurdan na hûmare gelêk kêm a. No sey heqeretî yo. Ma gore, derdê înan bi Kurdkî çin o. Wazenê wîna bi çend kesan çimanê ma bigîrê. Ma bixapênî. Ma sey Eğitim Senî vanê, wa perwerde bi ziwanê maye bêro dayîş. Sere ra hetanî peynî wa ziwanê ma bibo ziwanê perwerdeyî. Beno ke yew manaya dersa weçînitî estbo, labelê na game nêeşkena problemanê ma yê perwerdeyî çareser biko. “

Wa qet tayîn nêkerê hîna baş o

Ma na mesela kuçeyanê Dîyarbekî de şarî rê zî pers kerd. Şar vano ke; “No bes nîyo. No welat de çend mîlyon Kurdî estê. Na hûmare bes nîya û gere bêra zêdekerdiş. Ma wazenê wa tutê ma mekteban de bi ziwanê xo perwerde bivînê. Gere dewlete nê heqê ma bîyaro ca.

Xebere / Zazakî News