Kanalê televîzyonî Kurdistan24î 20 xebatkarê xo yê ofîsê Tirkiya gure ra eştî. Merkezê nê kanalî Hewlêr de yo.
8 serrîyo ke Kurdistan24 ameyo ronîyayîş. Ame zanayîş ke, semedo ke îdarekarê kanalî ameyê bedilnayîş, xebatkarî ameyê vetiş.
Bîanetî ra Ferid Demirelî xebatkarêkê Kurdistan24î yê verênî dir pêvînayîş kerd û ê xebatkarî vato " Ma 26 kesî televizyon de xebitiyayêne. Înan bedilnayîşê şîrketî kerd 'bahane' û 20 xebitkarî gure ra vetî."
Kurdistan24 TV kanalêkê nêzdîyê Serekwezîrê Hukmatê Herêma Kurdistanî Mesrûr Barzaniyî yo.
Goreyo ke ame zanayîş, îdarekarê kanalî xebatkaran ra waşt wa bê sîgorta û bi maaşêko kêm bixebityê la xebatkaran nê waştişê înan qebûl nêkerd. Naye ser o 20 rojnamegerî hetê kanalêkê Kurdan ra gure ra ameyê vetiş.
Çime: Bianet
