Cinîya Serekê Baroya Amedî Tahir Elçiyo ke 2015 de verê Mînareya Çarlinge de amebi qetilkerdiş, Wekîla Îstanbulî ya CHPyî Türkan Elçiye qerarêko balkêş girewt.
Goreyê xebera CEGA Medya, avukate Türkan Elçiye nêzdîyê hîrê aşmî verê cû qeydê xo yê Baroya Amedî da esteritiş. Ame vatiş ke Elçiye qeydê xo nêberdo baroya bajarêkê bînî û endamîya xo bi temamî qedînaya. Seba sebebê qerarî hema melumatêk nêameyo girewtiş.
Türkan Elçiye ke 1971 de Amed de ameya dinya, Fakulteyê Perwerdeyî yê Unîversîteya Dîcle de Beşê Ziwan û Edebîyatê Tirkî qedîna. Elçiya ke 15 serrî mamostetîya Tirkî kerde, dima ke mêrdeyê aye Tahir Elçi Sûr de ame kiştene, meslegê xo ra îstîfa kerd û dest bi perwerdeyê huqûqî kerd.
Elçiye dima ke Fakulteyê Huqûqî yê Unîversîteya Beykentî qedîna û ruxsetê avukatîye girewt, weçînayîşanê 2023yî de lîsteya CHPyî ra sey Wekîla Îstanbulî ameye weçînayîş.
Elçiye nika TBMM de Komîsyonê Yewîya Fursatî yê Cinî û Camêrdan de wezîfe kena.
