ZAZAKÎ NEWS – Kreş û Banê Miqatgehê Rojane yê Zarokistan Xalxalok, o ke Beledîyaya Peyasî de xizmetê zafziwanî dano de serrgêra perwerdeyî ya newîye dest pêkerd. Hemserekanê ke akerdiş de qisey kerd, ard ziwan ke seba kreşanê zafziwanîyan telebêko pîl esto û ayra seba akerdişê merkezanê neweyan do xebatan bikerê.
Zarokistan bi yew çalakîye dest bi serrgêra perwerdeyî ya newîye ya 2025-2026î kerd. Hemserekê Beledîyaya Peyasî Bêrîvan Gulşen Sîncar, Cengîz Dûndar, Hemserekê DEM Partî yê Peyasî, Hemserekê Beledîyaya Yenîşehîrî Mehmet Ergun, rayberê Sendîkaya Dîsk Genel-Îşî û keyeyê wendekaran akerdiş de ca girewt.
Telebî zaf bîyî, hewceyî bi kreşanê neweyan esta
Hemsereke Bêrîvan Gulşen Sîncare akerdiş de qisey kerd û va: “Bi wezîfegirewtişê ma, ma kewtî mîyanê yew xîretêko pîl ke sazîyanê ke hetê Qeyûman ra ameybî qefilnayîş yan zî bêfonksîyon mendbîyî, newe ra xizmetê şarê xo rê akerê. Zarokistan Xalxalok zî na rewşe de bi û ma serra verêne kerd aktîf. Gedeyê (domanê) ma tîya de ziwanê xo yê dayîke Kurdkî musenê. Telebêko pîl esto û ayra seba akerdişê merkezanê neweyan ma do xebatan bikerê.
Nê xizmetî ercaye yê
Hemserek Cengîz Dûndarî zî akerdiş de qiseykerdişê xo de va: “Ma tîya de xebatanê winasîyan rayra benê ke zaf waranê sey kultur, huner û psîkolojî de paştî danê averşîyayîşê gedeyan. Malimê ma yê dramayî yê ke warê xo de pispor ê, malimê ma yê huneranê dîmenkîyan, malimê ma yê muzîkî estê. Wexto ke ma xizmet danê, ma ziwanê dayîke esas gênê.”
Aktivîteyî do zafziwanî bê
Kreş û Bananê Lênêrînê Rocane de, gedeyanê 3-6 serrî rê çarçeweya perwerdeyê verê mektebî de hunerî do bêrê qezenckerdene. Gedeyî, çarçeweya çalakîyanê komelkîyan de do atolyeanê drama, muzîk, tîyatro, felsefe, tebîet, spor û hunerî ra îstîfade bikerê. Kreş û bananê lênêrînê rocane de çalakîyê seba verê mektebî do bi hawayêko zafziwanî bêrê dayene. Gedeyî, eşkenê rojanê hefteyî de mîyanê saetanê 08:00 û 17:00 de kreşanê Zarokistanî ra îstîfade bikerê.