ZAZAKÎ NEWS - Şaredarîya Peyasî (Kayapınar) semedê edebîyatê Kurdkî (Zazakî û Kurmanckî) gamêka weşe erzena. Şaredarî aşkere kerd ke ê do Musabeqa Hîkayeyan virazê. Pêro wendekaranê wendegehê lîseyî eşkenê beşdarê musabeqaye bibê.
Beyanatê Şaredarîye cêr de yo. Kesê ke wazenê beşdar bibê eşkenê tira malumat bigêr.
Temamîya wendekaranê wendegehê lîseyan bi hîkayeyê xo yê Kurmanckî û Kirdkî (Kirmanckî/Zazakî/Dimilkî) ke verê cû nêweşanîyê eşkenê beşdarî bibê.
ŞARTÊ BEŞDARBÎYAYÎŞÎ
- Musabeqa bi Kurdkî (Kurmanckî û Kirdkî/Kirmanckî/Zazakî/Dimilkî) yo.
- Pêro wendekaranê wendegehê lîseyî eşkenê beşdarê musabeqaye bibê.
- Beşdarkerdoxî eşkenê têna bi yew hîkayeyêk beşdarî bibê.
- Hîkayeyî ganî 4 rîpelê A4î ra dergî mebê.
- Beşdarkerdoxî ganî bi no hîkayeyê xo reyra beşdarê yewna musabeqayê hîkayeyî mebê.
- Beşdarkerdoxî hetê babetan ra serbest ê.
- Beşdarkerdoxî tedeyê hîkayeyê xo ra mesul ê.
- Heqê Şaredarîyê Peyasî est o û ganî qebûl bo ke hîkayeyê ke ameyî weçinitene bêheqê telîfî weşanîyenê û çap benê.
- Hîkayeyî ganî programê Wordî de binusîyê û e-maila ke cêr de nusîyaye ser o bierşawîyê.
- Beşdarkerdoxî ganî name û malûmatê îrtîbatê xo sey belgêyêk ciya bierşawê.
Netîceyê Musabeqayê Hîkayeyî 15’e Gulane de eşkera beno.
Wayîrê hîkayeyê ke ameyî weçinitene pê dîyarîyanê suprîzan reyra yenê xelatkerdiş.
Muracatkerdiş: 1’e Nîsane de dest pê keno û 10’e Gulane de qedîyeno.
Têkilî: [email protected]
Kaynak: Zazakî News
