Dewa Xwarikî ya qezaya Gimgimî ya Mûşî de xoverdayîşê vera projeyê Santralê Enerjîya Jeomertalî (JES)dewam keno. Nobeta xeyme ke serkêşîya Meclîsê Ciwanan ê Platformê Ekolojî yê Gimgimî de waro ke tede sondaj yeno plankerdene dîyaye destpêkerdene, vizêr roja 77ine de dewam kerd.
Çarçeweya nobete de vizêr bi sernameyê ‘’Xozaya Gimgimî û tehdîtê Jeotermalî’’ panel ame organîzekerdene. Mîkaîl Aslanî zî konserê paştdayîşî da.
Zanista Dormeyî Denîze Mîne Ozturka ke panel de qisey kerd, bale ante tesîrê xirabî yê sentralanê jeotermalan ê vera dormeyî ser û vat falîyetê sondajî zirar danê ekosîstemî.
Akademîsyen Dr. Mehmet Firatî zî ard ziwan ke Gimgim de xeylê nebatê endemîkî est ê û vat gerek rengînîya bîyolojîke ya herême bêro pawitine.
Mîkaîl Aslanî ke verê konserî qisey kerd, xoverdayîşê şarê Gimgimî selam kerd û vat, ''Destur medê nê projeyî. Domanê ma wa dewa xo, herra xo û mezelanê pîrik û pîrkalanê xo bisarisnê. 77 rojî yo şima xover danê. Ez hêvî kena no santral tîya nêro viraştene. Bi desturê Xizirî ma do destur medê. Ma rê santral lazim niyo, wa destê xo tîya ra biancê.''
