ZAZAKÎ NEWS– Weşanxaneyê Vateyî, xebatêka newîye ya akademîke weşanaya ke na xebate warê Zazakî de yew kêmanîye kerda temam. Kitabo ke hetê nuştox Pınar Yıldıze ra ameyo amadekerdiş, yew fekê Zazakî yo ke heta nika “nimite” mendo, ano roştî ser.
Kitab de yeno vatiş ke seba ke Zazakî hema newe-newe warê akademî de ca girewto, hewceyî bi xeylê xebatan esta û zaf fekanê Zazakî ser o hema zî cigêrayîş nêameyo kerdiş.
Xebate, fekê Zazayanê ke mabênê qezaya Çinarî ya Dîyarbekirî û qezaya Dêrike ya Mêrdînî de, yanî derûdorê Qerejdaxî de cuyenê, ser o ameya viraştiş. Nê Zazakî, derûdorê xo de bi nameyê eşîra xo “Mehelî” yenê şinasnayîş. Hetanî nika ne eşîra înan ser o ne zî ziwanê înan ser o xebatêke nêameya kerdiş û hayîya zaf kesan nê Kirmancan-Zazayan ra çin a.
Pınar Yıldız kitabê xo de balê ancena ser o ke, seba ke Mehelîyî mabênê mintiqayanê Kurmancan de yê û ê û Kurmancî zewijîyenê û têkilîyan ronenê, lehçeya înan roj bi roj hîna zaf binê tesîrê Kurmanckî de maneno. Hetêk ra zî hem Zazakî hem zî Kurmanckî zaf leze mîyanê Tirkî de helîyenê.
Na xebate de hem eşîra Mehelîyan yena daşinasnayîş, hem zî ziwanê înan ser o yeno vindertiş û ziwanê înan ra çend tekstî yenê pêşkêşkerdîş.