Goreyê amaranê Sazîya Îstatîstîkî ya Tirkîya (TUİK), Dêrsim bajaranê ke tede hûmara nufûsî ya serê 90 serrî tewr zêde ya, înan mîyan de yewin o.

Bajarê Dêrsimî, bi tebîetê xo yo bêemsal, awa xo ya zelal û nebatê xo yê endîmîkî şarî rê yew cuyê tebîî pêşkêş keno.

Kal û pîranê Dêrsimî sirrê emrê xo yê dergî eşkera kerd.

Dêrsim, ke wayîrê Gela Munzurî û Pilurî yo, serranê peyênan de sey bajaro ke cuyê tebîî paweno, vejîyayo ver. Bajar bi weşîya xo ya tebîî û kulturê xo, nê demanê peyênan de bajaranê ke tewr zêde turîstan meyman kenê, înan mîyan de yo.

Şarê Dêrsimî heta mecbur nêmanê, werdê fabrîkayan nêwenê.

Kal û pîranê Dêrsimî yê 90 serrî û serê ci, sirrê cuyê xo yê dergî bi werdê tebîî û tebîetê Dêrsimî girê danê. Ê neslanê neweyan rê şîret kenê ke werdê tebîî yê ke merdimanê verênan werdêne, biwerê.

Seydalî Kizilbogayê 94 serrî sirrê cuyê xo yê dergî wina eşkera kerd:

“Ez 94 serre ya. Ma qatix, run, mast û qeymax werdêne. Kesî çayî ra hes nêkerdêne. Ma nê çîyî meymananê xo rê zî pêşkêş kerdêne. Heme çimeyê awe yê ke koyî ra vejîyenê, derman ê.”

Alî Yildizo 90 serrî zî vat, “Heywanê ma estbî, ma run viraştêne, ma penîr viraştêne û ma tena ê werdêne. Runê ewroyênî run nîyo, ma vere cû runê heywanan werdêne la ma rê vatêne o run rind nîyo. Ma zî dest bi werdişê runê hazirî kerd û nêweşî dest pêkerd. Tansîyonê mi badê ê runan berz bi.”

Yaşar Soyluçîçekî zî wina vat, “Ma do, mast, toraq û run wemê, ma bi nê çîyan bîyê pîl û ma nînan ra fek veranêdanê. Hewayê Dêrsimî zî zaf weş o. Wexto ke ez Bursa de manena, tansîyonê mi her tim berz o la wexto ke êna Dêrsim, yeno war.”

Cemîle Çîçeka 80 serrî zî wina vat, “Bi saya runê ma yê verênî û toraqaêma, ma resayî nê serran û ma cuyê xo dewam kenê. Eke ma werdê nê demî biwerdêne, ma do dermanan ra nêxelisîyêne. Merdimê nika dermanan gurenenê, her çîyî şimenê, her ke şono hetê xirabîye ser o şonê.”

Emîne Demîr zî wina behs kerd, “Merdimê nika seba çîyanê ke wenê, emrê înan kilm o. Ciwanî mirenê, nêeşkenê bixebitîyê. La ez 70 serre ya û ez xebitîyena, no zî bi saya run û toraqo ke ez wena.”

Çime: Rûdaw