Munzur Can
Belê ma va ki ma do zonê(ziwanê)xo
qisêy bikî
biwanî,
binûsî,
la têyna yew roc nêy
her roc her wext u her ca di,
vernî di ma yewbînan rî tehmûl bikî
ma xo kesî sera nêvêynî
ma bizanî ki ma bê yewbînan nêbenî
ma bê yewbînan nêeşkenî biresî cayk,
ma vînenî ki bi se serano ma welatê xo di
şaro bînan rî bindestî
ma nêeşkenî welatê xo di
bi kamîya xo u miletê xo bicuwî
sebebê ê zî nêtepiştiş
nêheskerdişî yewbînan
u wayîrnêvetişê zonê ma yo,
kalikan u dapîranê ma
bi zonê xo qisêy kerd
bi zonê xo cuwîyayî
înan ra zaf kesî nê sebebra ameyî kiştiş zî
cuyayinê xo kerd vinî,
la ewro zaf dapîr u bawkalî estî
bi tornanê xo di nêeşkenî
zonê xo qisêy bikî!
no sûcê kamîyo?
ê dapîr u bawkalî zî nîyo
ê qeçekan(gedan) zî nîyo
sûcê pî u ma ya gedano,
pî u ma ya tûtan vanî
wa tûtî ma tirkî bizanî
wexto ki şêrî mekteb wa nêşermayî!
hahoo çi zonayen u heskerdişo pîl?
şimara perskeno eceba şima
nê gedan tûtan qiçekan'ê xo
bi zînciran zî girebidî ê reyna nêmûsî tirkî??
şima do çi çax çi wext zonê xo bi gedanê xo di qisêy bikî?
şima ewro gedanê xo bi zonê xo pîl nêkî
gedeyî şima ko çawa zonê xo gedanê xo di qisêy bikî?
çewres serra tepa
ko zonê ma nêmiro?
sebebê estbîyayiş sebebê cuwayîşê Zonê ma zî, sebebê çinêbîyayiş u merdişê zonê ma zî
no qirmê ma yo!
eger ma nêwazenî bibî qesasî Zonê xo
ma do bi zonê xo qisêy bikî
biwanî binûsî,
poşmanîya meştî perêy nêkena
wayîr vetişî zonê ma ewro yo
meştî ma erêy kewnî,
bimanê weşîyê di
bimanê bi zonê (ziwanê)xo,
heskerdişo pîl u hurmet seba şima..
