ZAZAKÎ NEWS - Aşma Remezanî de Amed de telebê seba çîgkofte her ke şono zêde beno. Seranserê bajarî de, hema hema sereyê her kuçeyî de rotoxê çîgkofte estê û verê saeta fitarî verê nê dukanan de dorê dergî virazîyenê.
Çîgkofte ke tamanê namdaran ra yew o, aşma Remezanî de Amed de “bi tonan” yeno rotiş. Xeylê nuqteyanê bajarî de di-hîrê çîgkofteroşî têkişta yewbînan de yê û bi taybetî verê fitarî qelebalixêko pîl virazîyen.
Çîgkofteyo ke nanê tîrî, marûl û lîmon dir yeno serwîskerdiş, semedo ke hem pratîk a hem zî ekonomîk o, zaf yeno tercîhkerdiş.
“Ma bi 22 kesan xebitîyenê”
Rotox Ergîn Yanar ke vano rojane nezdîya 12 hezar porsîyonan roşeno, wina qisey kerd: "Aşma Remezanî de seba ke ma biresê sîparîşan, ma bi yew ekîba 22 kesan xebitîyenê; eke wina nêbo ma nêresnenê, qelebalix zaf zêde yo. Ma şewe û roje bi vardîya xebitîyenê."
Welatîyan ra Erdal Ozkaplanî zî va ke ê çîgkofte ra hes kenê. Bi taybetî aşma Remezanî de ma zaf wenê. Her roj bibo zî ma wenê.
