Amed de, bi serekîya Hereketê Cinîyan ê Azadan (TJA), çarçeweyê 25ê Teşrîne Roja Mucadeleyê Mîyanneteweyî ya Vera Şîdetê Serê Cinîyan de, bi şîarê "Bi cimatêko demokratîk cuyayîşêko azad û bêşîdet" rayraşîyayîşêk ame viraştiş.
Rayraşîyayîşî rê Varvatoxa Partîya DEMî Ayşegul Dogan, Sereka Şaredarîya Pîle ya Amedî Serra Bucak, aktîvîsta TJAyî sîyasetmedare Sebahat Tuncel, Mayê Aştîye û bi hezaran cinîyî beşdar bîyî. Rayraşîyayîş verê Hepisxaneyê Kehenî de dest pêkerd û heta verê Plazaya AZCyî yê Semtê Ofîsî dewam kerd.
‘Waşt ke vengê ma bibirnê’
Komîsyonanê Edaletî derheqê Rojîn Kabaîşî de eşkerayîyêka kilme da û vat: "Ma seba ke mergê şikdarî yê Rojîne roşn bikerê, xeylê xebitîyayî, her rayîrî ceribna. Waştê ke vengê ma bibirnê labelê nêeşkayî."
Dima ra aktîvîsta TJAyî Sebahat Tuncelî qisey kerd û bale ante serê tarîx û muhîmîya 25ê Teşrîne û wina va:
“Seba Rojîn Kabaîşî ame vatene ke aye xo kişt. Vejîya meydan ke hetê camêrdêkî ra ameya qetilkerdiş, la hema zî faîlê ci nêzanîyenê. Faîlê Narîne hema zî nêzanîyeno. Gulîstan Doku hema zî vîndî ya, faîlê ci hema zî bewlî nîyê. Cinîyî her roje yenê qetilkerdiş. Bi raştî, ma faîlan zanê. Camêrdê ke sîstemê camêrdserwerî ra benê wey, ê yê. Nê bi zanayîş, bi waştiş qetil kenê.
'Jin, jiyan, azadî tena slogan nîyo'
Varvatoxa Partîya DEMî Ayşegul Doganî zî nê çîyî vatî:
“Ewro ma vanê wa kes binê zextî de mebo, wa brayîye, azadîye, demokrasîye û aştîye biba. Ma nêameyî qebulkerdiş, ziwanê ma nêame qebulkerdiş. Çira cinîyî ameyî hedefgirewtene? Çunke cinîyan bi ruhêko fedakar, xoverdayox û rayberîye, seba cimatî rayberîye kerde. Wexto ke cinîyî qerar danê, kes nêeşkeno vera qerarê înan de bivindero. Semedê ney , 'Jin, jiyan, azadî' tena slogan nîyo. Yew vindertiş o. Vera şîdetî yew vindertiş o. Vera neheqîye û zilmî yew vindertiş o.”
Ayşegul Dogane qiseykerdişê xo wina domna: "Karê ma zaf o. Ganî ma seba awankerdişê cuyayîşê neweyî, seba mucadeleyî amade bî. Ganî ma yewîya xo bihêz bikerê. Rayîrê ma derg o. Kede, sebir, mucadele lazim o."